Manchester United rawlthar theihna ngah tak JJ Gabriel chuan club chhuahsan a dil (transfer request a thehlut) tak thut avangin Old Trafford hotute chu an ṭhawng hle. Thawhlehni khan he chanchin hi rawn puakchhuak mah se, United hotute chuan he kum 15 mi hian club chhuahsan a duh tih hi an lo hre lawk tawh a ni.
Leigh Sports Village-a Sabah youth team laka hat-trick ropui tak a khung hnu darkar khat lekah, Gabriel hian a social media account hrang hrang aṭangin United nena inzawmna an neihna zawng zawng a paih fai vek a, hei hi club tana a inlan hnuhnun ber a ni tawh maithei a ni.
Gabriel hi a chhuak a nih chuan lakluh theihna dinhmun ṭha bera ding chu Real Madrid an ni a, Gabriel-a chhuah theihna chance pawh a sang tial tial bawk. United lamin inremna kawng dap theih an la beisei laiin, Gabriel-a aiawhtute erawh chuan a hmabak chu Manchester piah lamah a awm zawk niin an ngai thung. Gabriel-a hian Europe club lian duhsakna a ngah hle a, a chhungte hian Barcelona pan pui an lo duh ṭhin viau bawk a, chutih laia Madrid-in an bawhzui zual ta hian ngaihven a hlawh lehzual a ni.
Spain khawpui a pan a nih chuan Gabriel hi Real Madrid Castilla lamah dah phawt beisei a ni a, Real Madrid senior team tana inlan thei naupang ber record neitu Martin Odegaard-a record (kum 16, thla 5 leh ni 6 mi a nih laia a debut siam) chu khumtir an rilruk bawk. Gabriel hian October ni 6 hian a kum 16-na a tlin dawn a, awmzia chu Real Madrid hian January emaw February thla tawp lamah senior debut an pe a nih chuan Odegaard-a record hi a khum thei dawn tihna a ni. Bayern Munich leh Paris Saint-Germain te pawhin an ngaihven a; Manchester City, Chelsea leh Arsenal te pawhin a boruak hi uluk takin an thlithlai reng bawk.
Kum 2025 February thla khan Manchester Evening News chuan Gabriel hian Irish passport a kawl tih an lo tarlang tawh a, hei vang hian Europe club liante beng a verh nghal hle a ni. Gabriel-a pa Joe O’Cearuill hi Republic of Ireland international hlui niin, Cork khua aṭanga an thlah chhuah an nih avangin Gabriel hian he passport hi a nei thei a ni. Brexit dan hnuaiah English player-te chu ram pawn club zawm turin kum 18 an tlin phawt a ngai ṭhin a, mahse Gabriel ang European passport kawl sa tan chuan he dan hi zawm a ngai ve lo a ni.
Chutih rualin, kum 18 tling lo transfer chungchangah FIFA dan khauh tak a awm a. Naupang hmansualna laka venhim nan FIFA hian ram hrang inkara kum 18 tling lo inleisak hi an khap bur a ni. Mahse, footballer chhungte chu football thil vang ni lova chumi rama insawn an nih thu nemnghehna ṭha tak a awm erawh chuan phalsak theihna dan a awm a. Gabriel-a aiawhtute hian he dan lianpui hi an paltlang theih an inrin tawk loh chuan chhuahna lehkha hi an thehlut hauh lo vang tih mi thiamten an sawi bawk.
Nilaini zana Brighton nena an inkhelh hmain, Gabriel-a chungchangah United-in official thuchhuah an siam dawn anga thu a darh chiam kha chu inbiakpawhna dik tawk loh vang a ni a. Head coach Michael Carrick chuan match zawhah chauh he naupang chungchang hi a sawi theih tur thu a lo tarlang tawh a ni. Inkhelh zawh hnuah press conference-ah kum 15 mi academy player chungchang manager zawh a ni chu mak deuh mah se, Gabriel-a chhuah dilna hian club chhung leh pawn a dengchhuak hneh em a ni.
Gabriel hian United tana khelh hi a ngaina em em a, first-team training hmun Carrington-a kal pawh a nuam tih ber zinga mi a ni. Adam Lawrence-a hnuaiah U21 tana a khelh hnuhnun berah pawh match ball la chungin coach-te nen an la hlim dun hle a ni. Stephen Torpey chu academy head atan ruat a ni a, Gabriel-a aiawhtute pawhin he ruatna hi an lawm hle. Mahse, United hian engtiang pawhin chelh tum mah se, Gabriel-a rilru thlak danglam chu thil harsa tak a tling chho mek a ni.
