Premier League table-a 12-na dinhmuna awm mek nih hi Manchester United ṭantute suangtuahna a ni lo chiang hle mai, mahse Craven Cottage-ah Fulham nen 1-1 a an inhnehtawk hnuah erawh he dinhmun khirh tak hi an hmachhawn a ngai ta mek a ni.

Head coach Michael Carrick chuan a tir aṭangin nawrna (pressure) lian tak a hmachhawn nghal der a, Fulham laka an khelh dan phung hmuhnawm loh tak avang hian international break chhung hian a coaching kalpui dan chungchangah zawhna khirh tak tak a hmachhawn a ngai dawn a ni.

He inkhelah hian Matheus Cunha chuan hun tawp dawn hnaiha goal a khung hmangin United chu point khat a hlawhchhuahpui hram a, mahse inkhelh zawha a thutarlang erawh Carrick-a'n chanchinbumite hmaa sawifiah a tum dan nen a inpersan hle thung.

Craven Cottage-a an inhnehtawk hnu hian, chanchinbumiten United chu khelmualah an 'passive' (thawkrim tawk lo leh thununna hloh) lutuk anga an puhna chu Carrick chuan a la na hle a, zawhna zawtute chu a chhang ram hle a ni.

Carrick chuan, "Khelmualah khan kan che ngaihsam (passive) niin i ngai a maw? Passive maw? Football hi game harsa tak a ni a, hetiang hun hi a thleng ve ṭhin. Chu chuan passive i ni tihna a kawk lo. First half-ah phei kha chuan inkhel kan thunun hle a ni," tiin a sawi chhuak a ni.

Mahse inkhelh chhung zawng khan Fulham lamin tlan kual tam lamah United an khum chiang hle a, commentary-a ṭhu Manchester United defender hlui Gary Neville pawhin Carrick-a naute tha thawh tlem lutuk leh phurna nei lova an inlan mai mai chu pawi a tih zia a sawi chhuak nghe nghe a ni.

Carrick hian a naute chu an khel ngaihsam lo tiin humhim tum eng ang mah se, goal thuntu Brazilian forward Cunha erawh chuan United-in khelmualah thahnemngaihna (tenacity) an tlachham tih tlang takin a pawm thung.

Sky Sports hnenah Cunha chuan, "A harsa khawp mai. Anni (Fulham) khan keini aiin tha an thawh hnem zawk a, tha an ngah zawk bawk; hetiang ringawt hi chu kan pawmzam mai theih a ni lo," tiin a sawi a ni.

He Brazilian striker hian khelmuala phur taka chet chhuah leh tha thawh kawngah United chu an tumpuite lakah an hnuaihnung zawk a ni tih a thup miah lo va, hei hian club tana thil ngaihtuahawm tak a nih zia a tarlang chiang hle.

He thil hi Michael Carrick-a'n ngun taka a chinfel vat a ngai dawn a ni. United-in fitness leh intensity (ngawrh taka khelh) an tlakchham lutuk hi thil ngaihtuahawm tak a tling a, chu aia ngaihtuahawm zawk chu he harsatna hi thup bo tuma first half-ah "inkhel kan thunun" tia awlsam taka sawi liam mai a tum hi a ni.