Manchester United striker Benjamin Sesko-a hliam neih chungchangah club legend hlui Paul Scholes leh Nicky Butt ten rinhlelhna leh ṭawngelna an neih hnuah, a ram (Slovenia) khelhpui Jaka Bijol chuan Sesko-a thlavang a rawn hauh ve ta thung.
Inrinni liam taa Fulham nena an inhmachhawn ṭum khan a chawn ruh (shin) lamah harsatna a neih avangin he forward hi match khel tur squad aṭangin dah chhuah a lo ni tawh a. Inkhelh zawhah United boss Michael Carrick chuan Sesko hian chutiang harsatna chu a tawk ngei tih tarlangin, uluk zawka endik a nih tur thu a nemnghet bawk a ni. Thawhṭan zan khan United chuan international break lo awm turah Sesko chu Slovenia squad aṭangin a inhnukdawk tih an puang zui a, club thuchhuah chuan: "A taksa inenkawl chhoh dan tur ruahmanna fel tak siam a nih hmain, tun kar chhung hian Benjamin hian endikna (test) a paltlang ang," tiin a nemnghet a ni.
Hetiang thuchhuah a awm chung hian, United midfielder hlui Scholes leh Butt chuan Sesko-a hliam nat dan chu rinhlelhawm tak niin an chhuah thung a. Heng United player hlui pahnih hian Fulham laka false nine-a Carrick-a'n Matheus Cunha a chhawr dan pawh sawiselin, Cunha chu hetiang dinhmunah hian a ṭangkai tawk lo hle niin an ngai bawk a ni.
'The Good, The Bad and The Football' podcast-ah Scholes chuan, "A tliak a nih loh chuan, i shin pad kha vuah la inkhel ve mai rawh," a ti a, Butt pawhin, "Player i nih chuan - i chawn ruh a tliak a nih loh vek chuan i khel tur a ni ringawt mai!" tiin a lo tuihnih ve bawk.
Mahse, Slovenia defender Jaka Bijol chuan heng an ṭawngkam chhuak hi a ngaithei lo hle a, a chhanglet ve nghal a ni. Bijol chuan, "Beni hian hetiang pressure lakah hian engtin nge a inthiarfihlim dawn tih a hriat ka beiseiin ka ring tlat a ni. Khelmualah thil a kal tluang lo a, rinhlelhna i neih laia hetiang thil chhiar lehzel chu mahni inrintawkna tihniamtu lian tak a ni thei a ni.
"A theihna hi kan hrechiang tlang vek a, hetiang thilah hian a beng a chhi lutuk tur a ni lo. Amah ngei pawhin eng ang player nge a nih tih a inhria a, khelmualah pawh thil ropui tak tak tiin a theihna a pholang fo ṭhin reng a ni," tiin a ṭhianpa chu a ṭan zui hle.
Thawhlehni zing khan Sesko chuan Instagram-ah Slovenian ṭawng ngeiin thuchhuah siamin, "Ram tana match lo awm tur ka hmaih a ngai ta mai hi pawi ka ti takzet a ni. Thinlung zawng zawng leh chhuang tak chungin Slovenia tan ka khel ṭhin a, ka khel chhunzawm zel bawk ang.
"Tunah chuan ka dam chhuah leh vat theih nana inenkawlna chauh hi ka rilru luahkhattu ber a ni. Ka ram team leh ka club tan theih tawp ka chhuah leh vat theih nan, khelmuala kir leh thuai tumin ka inenkawl mek a ni. Kan naute theihnaah hian ka ring tawk a, tun ṭumah pawh kan team inpumkhatna ṭha tak an pholang leh ngei ang tih ka chiang a ni. National team jersey hak leh hun ka nghakhlel hle a; chumi hma chu Slovenia thlawptu lian ber ka ni reng ang," tiin a tarlang.
International break zawh hnu, October 10 hian United chuan Premier League-ah Tottenham an hmachhawn dawn a, he inkhelh hma hian Sesko chuan inenkawl nan chawlhkar eng emaw zat hun a nei dawn a ni.
