Manchester United boss Michael Carrick chuan tun hnaia an chet chhiat chhunzawm zel avangin pressure nasa tak a hmachhawn mek a, Premier League match ruk an khelh tawhah point ruk chauh an la hlawhchhuak a ni.

Atletico Madrid an hmachhawn hmain, radio pundit Simon Jordan chuan talkSPORT kaltlangin United manager dinhmun chungchanga a ngaihdan chu tlang takin a phawrhchhuak a ni.

Carrick-a dinhmun sawiin Jordan chuan, "He hna hian a la bawh hneh lutuk niin ka hria, a tlin loh hmel takzet a ni," tiin na takin a sawisel a. Tun season match hmasa lamah United hian tha leh thahrui an tlakchham bakah, tactics lamah an la puitling tawk lo hle tih a lang chiang a, chu mai bakah Carabao Cup aṭang pawhin an tla tawh bawk a ni.

Jordan chuan Carrick-a'n Middlesbrough a lo enkawl tawh dan sawichhuakin, "Championship aṭanga team kaisangpui zo lo tu kha engtik lai khan nge Manchester United manager a lo nih ve tak ngawt mai le?" tiin zawhna a zawt hial a ni.

Hetianga an chet chhiat chhoh tak reng avang hian a thlaktu tur chungchang sawirik a awm ṭan nghal a, Italian media lam chuan Carrick-a dinhmun luah tur hian Antonio Conte chu an dawr mai theih thu an tarlang ṭan tawh a ni.

Carrick hi dinhmun derthawnga awm awmchhun a ni lova, Ineos thutlukna siamtu zinga mi Jason Wilcox leh Omar Berrada te pawh United fans lam aṭangin duh lohna leh sawiselna an tawk nasa hle bawk.

Antonio Conte hi amah chhawrtu club hotu lian zawkte nena inbakkaih fo ṭhin a nih avangin, Simon Jordan chuan transfer bazar-a Ineos hnathawh ṭhat tawk loh chungchangah hian a ngawihbopui mai mai dawn lo tih a sawi bawk a ni.

Jordan chuan sawi zelin, "Conte chuan thil a tisawp vel mai mai lo ang. United board hian Conte ang mi hi an phu zawk a ni mai thei, a chhan chu Conte chu he hmuna a kal chuan a phawrh mualpho nghal vek dawn a, a duh ang angin a ti dawn a ni. A chetdan ṭhenkhat chu ka duh viau maithei a, ama hlawkna tur chauh a ngaihtuahna chin pawh a awm tho mai thei. Mahse thil a tisawp kual mai mai ngai lo a, nomawi lian a chawi ṭhin tih chu phat rual a ni lo. Engtin pawhin la se, nomawi chu a la nge nge ṭhin," a ti.

Season liam ta tawpa Napoli a chhuahsan hnu khan Conte hi club enkawl mumal nei lovin a la awm chhunzawm reng a. Kum 2024-25 season khan Napoli chu Serie A title a lo lakpui tawh a, mahse 2025-26 season-a pahnihna an nih hnuah club hi a chhuahsan zui ta a nih kha. He Italian manager hian a hma pawhin Chelsea chu Premier League nomawi a lo chawipui tawh a, Tottenham Hotspur pawh hun eng emaw chen a lo enkawl tawh bawk a ni.