Manchester United-in a zawnin match nga (5) an chak hma chu sam meh duh lo tu fan lar Frank Ilett hnenah, United manager hlui Ruben Amorim chuan a sam mehtir theih loh avangin ngaihdam a dil tih hriat a ni.
Social media lama 'The United Strand' tia hriat lar Ilett hian kum 2024 October thla khan he thutiam hi a lo ṭan a ni. Hemi hnu thla khat lekah Amorim hian Erik ten Hag-a thlakin Sporting CP aṭangin Old Trafford a rawn pan a. Kum 41 mi Portuguese coach hian Europa League final thlengpui mah se, United dinhmun a siksawi hleithei lova, a season hmasaberah 15-na niin a khar a, January thlaa parukna an nih laiin ban a tawk ta a ni.
Old Trafford-a a awm chhung khan Amorim hian vawi hnih ngawt a zawnin match thum chhung chakpui mah se, Ilett-a tan sam meh theihna khawp match nga chakpui erawh a nei thei ta lo a ni. Tun hnaiah AC Milan boss thar Amorim leh The United Strand te hi an inhmuchhuak hlawl a, Amorim hian United a enkawl laia he chona a titawp thei lo chu ngaihdam a dil nia sawi a ni.
Instagram lama a thlalak tarlanah, Amorim nena an din dunna thlalak dah chungin Ilett chuan, "Portugal Football Summit-ah Ruben Amorim ka tawk chu a lawmawm hle mai. Min rawn hmu a, ka sam kawk chungin nui hmel puin 'Khatiang a thlen avang khan ngaihdam ka dil e!' min ti a," tiin a tarlang a. "Ka la ngaina reng tho mai," tiin a sawi zawm bawk.
He chona a kalpui chhan hi The Little Princess Trust tana sum leh tha thawh a ni a, he pawl hian cancer leh natna dang vanga sam hloh naupangte hnenah sam lem (wig) a thlawnin an pe ṭhin a ni. United fan lar tak hian a hmain Reds-in a zawnin match nga an chak hunah chuan Old Trafford khelmual ngeia a sam hi meh a beisei thu a lo sawi tawh ṭhin a ni.
September 2025-a talkSPORT in an kawmnaah, "Engmah ruahmanna nghet a la awm lo va, mahse ka duhthusam ber chu Old Trafford-ah United player pakhat talin min mehsak hi a ni," tiin a lo sawi tawh a. "Ka hnenah biakna an la rawn nei lo hi ka hrethiam em em a ni. Mahse team lam an chet ṭhat chhoh va boruak a fuh chhoh hunah, a zawnin match li kan chak a nih ngat chuan, he thil hi min buatsaihsak theih ka beisei tlat a ni," a ti bawk.
United hian a zawnin match nga an chak hnuhnun ber chu February 2024 daih tawh khan Amorim-a hmaa an manager Ten Hag-a hnuaiah a ni a. Michael Carrick-a'n mawhphurhna a lak tirh khan Ilett hian a chona titawp teuh berin, Carrick-a hian a match hmasa li a chakpui hnuah February thla khan West Ham nen an inhnehtawk ta hlauh a nih kha.
October 5, 2024-a a thutiam aṭanga chhutin, The United Strand hian a sam a meh meuh chuan kum hnih chuang zet sam met lova a awmna a ni tawh ang. United hian international break hmain Fulham nen an match hnuhnung berah draw an nei a, October 10 hma chu Tottenham Hotspur an hmachhawn dawn lo a ni.
Chutih laiin Amorim chuan Milan-ah season bul ṭan ṭhain Serie A-ah pangana dinhmun an luah mek a. United-a a awm laia a tihsualte, a bikin back-three formation a ṭan tlatna aṭangte khan inzir a tum thu a sawichhuak a ni. "Manchester-a ka tihsualte kha ka nawn thei tawh lo. Inkhelh dan bika khel thei tur zia team-in an neih loh chuan kan insiamrem a ngai a ni. Helai Italy-ah chuan coach-te hi an thiam hle a, team dangte mimal tina umzui kawngah an ṭha zual hle a ni," a ti.
