Manchester United striker hlui Rasmus Hojlund chuan Pathianni zana Nations League match-a Wales laka a goal khung nia a lo hriat chu official-te'n 'own goal' tiha an pawt thlu mai chu mak a tih thu leh a awih loh hle thu a sawi.
Pathianni zan Copenhagen-a inkhelah khan Denmark chuan Wales chu 2-0 in an hneh a. Hojlund hian goal a khung emaw tiin mualneitu fan-te hmaah phur takin a lawm chhunzawm nghal a, mahse replay-ah chuan a ball pet chu Wales defender Ben Davies-a ke a vuak per leh tak avangin official-te chuan Davies-a own goal tiin an chhiarsak ta zawk a ni.
Match zawha TV2 ten interview an neihnaah he thil hi an hrilh a, Danish striker Hojlund chuan mak a ti takzet. "I ti tak tak em ni? Ka nu thlan chhan meuhvin ka sawi ngam, ball kha ka khawih chiang alawm," tiin Hojlund chuan a sawi a. "Chuvangin thutlukna hi an thlak a ngai a ni. Ball kha ka khawih ngei niin ka hria a, thil thleng hi re-done a, ziak ṭha leh turin kan ngen a ngai ang. A chhan chu ball kha ka khawih chiang a ni," tiin a nui zui bawk.
He match-ah hian Denmark hian first half-ah Gustav Isaksen-a hmangin goal an khung hmasa a, mahse build-up ah offside a awm avangin VAR hmanga enfiah a nih hnuah pawmsak an ni lo. Second half-ah Mikkel Damsgaard-a free-kick pet chu a per a, Wales goalkeeper Danny Ward-a pehhleihtheih lohin goal-ah a lut ta a. Hemi hnu minute 60 hnaih lamah Isaksen chuan goal pahnihna a khung zui ta bawk a ni.
Hojlund hian 2025 nipui lai khan Manchester United chhuahsanin loan-in Napoli a pan a, kumin tir lam khan £43.2million-in he Italian club hian a nghetin an la lut chhunzawm a ni. Kum 2023 nipuia Atalanta aṭanga Old Trafford a zawm hnu khan, Red Devils tan inelna hrang hrangah match 95 inlanin goal 26 a khung hman a ni.
Kum 23 mi striker hian a ram Denmark tan goal khungna hun ṭha hi Ningani hian a nei leh nghal dawn a, Nations League-ah Portugal an hmachhawn ang. He match-ah hian United captain Bruno Fernandes pawh a inlan leh theih beisei a ni a; Pathiannia Portugal-in Norway an hneh ṭum khan hliam vangin Fernandes hi inlan thei lo mah se, tun karchhunga Denmark nena an inkhelh turah erawh fit takin a rawn inlan leh theih tawh pawh a beiseiawm a ni.
