International break a zawh rualin Manchester United chuan khelmual luhchhilh leh turin an inbuatsaih mek a, chawlhkar tawpah hian mualneitu niin Old Trafford-ah Tottenham an mikhual ang. Manager Michael Carrick-a tana pressure awm mek chu international break hian zangkhai deuh mah se, a player-te aṭang hian khelmual chhungah rahṭha a mamawh takzet tawh a ni.

United hi tun season Premier League game nga an khelh tawhah point nga chiah an la hmu a, 12-na dinhmunah an awm mek a ni. Hetiang dinhmun tlahniam tak hian club ṭantute rilru a ti-hnual hle a, mahse United midfielder hlui Quinton Fortune chuan thil thleng reng rengah chhan leh vang a awm thu a sawi. Fortune chuan Benjamin Sesko, Amad Diallo leh Carlos Baleba te pathum chu team chawikan nana player pawimawh ber ber an nih tur thu a tarlang a ni.

Boyle Sports nena an inbiaknaah Fortune chuan, "Season inṭan tirha an striker ber (Sesko) inlan thei lo kha an tan a harsat phah hle a, Hull City laka bul an ṭan dan pawh kha beisei loh tak a ni. Match hnuhnung zawka an chet dan kha a harsa deuh hlek a ni. Baleba an lalut a, fitness ṭha famkim a neih leh hun kan nghak mek a ni. Player zawng zawng - Amad, Baleba leh Sesko te an fit tling tak tak a nih chuan, he team theihna (potential) san zia hi in hmu chiang thei ang," tiin a sawi.

International break chhung hian Sesko, Amad leh Baleba te tana fitness ṭha neih leh nana hun remchang a thlen a. Heng player thumte zingah hian Brighton aṭanga an lakluh Baleba hi khelmuala inlan hnai ber a ni a, Lausanne nena friendly match an khelh ṭum khan inlanin, Fulham laka an inkhelh ṭum pawhin bench-ah a ṭhu tawh a ni. Kum 22 mi he midfielder hian United tana a debut match khelh a chak tawh hle a, Tottenham an hmachhawn hunah pawh bul a ṭan zui mai theih a ni.

Carrick-a hmabak chungchang sawi a tam hle a, mahse Fortune chuan United boss hi khelmualah an kir leh thei ngei ang tih a ring tlat a ni. "Season liam ta khan an che ṭha hle a, chuvangin hmalam pan zel tura beisei an ni. Michael Carrick hi ka ngaina em em a, manager ṭha tak leh mipa ṭha tak a ni. He international break hi an tana intihdamna (reset) nei tura hun ṭha tak a ni tlat a ni. Player te an rawn kir thei dawn a, hun dik tak a ni. Baleba, Amad leh Sesko te an fit ṭha tawk a nih chuan hetah hian bul ṭha tak an ṭan leh thei dawn a ni," tiin Fortune chuan a sawi belh a ni.

United hian khelmualah bul ṭan thar inhuam hle mah se pressure lian tak an hmachhawn mek a ni. An mikhual tur Tottenham hi 20-na dinhmun luah mek ni mah se, United hian match hnuhnung berah 19-naa awm Fulham pawh an lo hneh lo tawh a ni. Hemi hnu hian inelna harsa zawk an hmachhawn zui dawn a, Champions League-ah khualmualah Atletico Madrid an tlawh ang a, hemi hnu hian Premier League-ah inelna hmang ṭha mek Leeds United chu Elland Road-ah an luhchhuah zui bawk ang.