Champions League match-a Atletico Madrid laka 2-0 a an tlawm hnuah, Manchester United defender Lisandro Martinez-a'n club hotute a chhuahchhal zui tak avangin a chungchangah club thuneitute'n eng thutlukna nge an siam dawn tih chu ngaihven a hlawh chho hle. Thawhleh zan inkhelh zawh hlim TV interview-ah he Argentine defender hian United thuneitute chu na takin a sawisel a nih kha.

Amazon Prime hnena a sawinaah Martinez chuan, "Kan technical director lakah hian beisei ka nei sang zawk a ni. Thudik tak ka sawi a ngai, in hria em? Player-te pawhin hma kan sawn a ngai a, mahse hetiang zan pawimawh hmachhawn tur hian squad chak ṭha tak din a pawimawh em em bawk a ni," tiin a sawi. Chu mai bakah, thuneitu liante'n mawh an phurh bawk si loh chuan, head coach Michael Carrick ban chu chhanna a nih loh thu a sawi zui hial a ni.

United lam erawh chuan an director of football Jason Wilcox chu club-ah a cham chhunzawm zel dawn tih an nemnghet thung. Nilai zan khan Martinez hian a thusawi sawifiah nan thuchhuah siam mah se, ngaihdam erawh a dil chuang lo a ni.

Instagram lama a thuziakah Martinez chuan, "Nimin lama ka thusawi chungchanga ngaihdan hrang hrang awm mek karah hian, ka thil sawi leh ka rilru puthmang tlem sawifiah ka duh a ni. Inkhelh zawh hlim khan kan duh ang result kan hmuh loh avanga thinrim leh rilru hah vangin ka lo ṭawngchhuak ta a ni.

"Min hrechiangtute chuan football ka atchilh zia, ka inpekna leh chak ka duhna san zia an hria ang. Thil a kal tluang loh hian a na em em a, a bikin Manchester United ang club lian leh ropui aiawh mekte tan phei chuan a na lehzual a ni. Ka thusawi khan ka rilru puthmang leh he club-in nomawi lian a chawi leh theih nana ka duhthusam a pholang a ni. Hetiang dinhmun sang phut hi he jersey ha tute mawhphurhna a ni reng a ni.

"Beisei ka neih san zawk thu ka sawi khan, he club-a telte zawng zawngin thiltum sang kan neih a ṭul zia ka sawina a ni. Ṭhang lian zel tur leh, chak zawk ni tura inelna sang ber hmachhawn theihna tur kan neih a ngai a ni. Heng tehna sang takte hi keimah aṭanga ṭanin kan zawm vek a ngai a ni," tiin a ziak.

A sawi zawmnaah he defender chuan, "Player-te hi khelmuala thawk chhuak tura mawhphurhna nei hmasa bertu kan ni tih ka hria a, chu mawhphurhnaah chuan keimah ngei pawh ka innghat hmasa ber a ni. Kan theihna aia tam kan thehchhuah a, Manchester United hi a sang bera hruai kir leh turin kan ṭanrual a ngai a ni.

"Ka ṭhiante, kan manager leh he club hmasawn nana thawk mektute zawng zawng hi ka ring tawk em em a ni. Hmathlir sang tak leh inpekna nen kan thawhho zel hi kawng awmchhun a ni tih ka ring tlat a ni. Ka thil tum chu a tira mi ang tho kha a la ni reng: chak te, sang bera inel te leh he club tan hian ka theihna zawng zawng pek hi a ni," a ti bawk.

Tun dinhmunah hian Martinez-a chungchangah United hian hma an lak dan tur an ngaihtuah mek a. Fans leh chanchinbumite zingah pawh club hotute chanchin sawichhuaktu Martinez hi hrem phu a ni em tih chu zawhna lian tak a tling chho mek a ni.