A zawnin vawi hnih ngawt an tlawm hnuah, Pathianni khan Manchester United chuan league mawngphah ami Fulham chu 1-1 in an inhnehtawkpui a. Paper lamah chuan result ṭha zawk ang hrimin lang mah se, an khelh dan phung erawh an match hmasa pahnih ai pawhin a chhe zawk hial niin an thlir a ni. Premier League-a team dinhmun hniam ber hian inkhel chhung zawng deuhthaw United hi mual chhungah an pawt phar a, Carrick-a player-te hian theihna thehchhuah leh thawhrim tumna an nei lo hle.

Hei hian United-in Premier League-a bul an ṭan chhiat ber zualpui a chhunzawmtir zel a, Matheus Cunha-a pet per goal hlauh lo se chuan tlawm ngei tur an ni bawk. He inkhela an khelh dan rapthlak tak avang hian kar thum lo kal tur chhung hian Carrick-a dinhmun hi ngunthluk taka bihchian a ni tawh dawn a, dinhmun a siamṭha thei dawn lo nia an hriat phei chuan head coach aṭanga ban hial pawh a tawk mai thei a ni.

Sky Sports-a a sawinaah, minute 55-na vel aṭang tawh khan United defender hlui Gary Neville chuan Fulham laka United khelh dan chu club chanchina a la hmuh chhiat ber a nih thu sawiin mak a tih zia a pholang a. Carrick-a ngaihtuahna tibuai em em tur thil pawh a tarlang nghal bawk.

Neville chuan, "Michael-a ngaihtuahna tibuai em em tur zawk chu, half-time-a team-talk an neih hnu lawka hetiang em ema phurna nei lova an rawn chhuak leh thei hi thil mak tak a ni," tiin a sawi.

He thu a sawi lai hian United player-te chu phurna nei miah lovin muangmar takin mual chhungah an vei kual mai mai a, tlan peih lo leh tackle pawh tum chuang lovin inkhel an thunun zui bawk si lo. Khelmuala awm player 11 zingah, Kobbie Mainoo leh Senne Lammens te pahnih tih loh chu a bak zawng chuan hnehna chan tumna leh manager tana theih tawp chhuah tumna nei lovin tlawm sa ang maiin an awm a ni.

Goal an sut leh tak avang ngawt khan an khelh ṭhat phah chuang lo va; Carrick hian a player-te lakah rinna leh thlawpna a hloh tawh a ni tih nemnghettu thil a tling hial awm e. Chutiang a nih loh vek pawhin hetianga phurna leh tha thlah taka khelh hi manager ruahmanna sa a nih ngat phei chuan, ban nghal tlak a ni hrim hrim ang. Player-te hian manager tan hian theihtawp chhuah an tum tawh lo tih a chiang hle a, hei hian club thuneitute leh board member-te chu a tibuai hle tur a ni a, United hian Carrick hi ban ta thut se tun dinhmunah chuan mak tihna tur a awm tawh lo hial ang.

Tun season chhung zawng hian United hian fitness lamah harsatna an tawk reng a, pre-season chhung khan Carrick-a'n fitness lam ngaihsak lovin technical work chauh a buaipui thu Youri Tielemans-a'n a lo sawi tawh a nih kha. Carrick hian a team te hetianga zawi leh muangchanga an awm hi a pawi a ti lem lo a nih hmel a, pawi ti nise chu tunah chuan a thlak tawh ngei ang. Mahse he buaina hi kar tlemte chhung hian fitness training khauh tak hmanga a chingfel a nih loh chuan, chawl mai se United hian season thlak danglam theihna hunṭha an la nei thei zawk ang.

Neville-a rilru buaina hi United fan-te zawng zawng ngaihdan a ni a, he thil hi thil danglam thut awm lova a ngai reng a nih chuan inthlakthlengna a ngai ngei dawn a ni. Carrick hian an player-te tha thawh danah a lungawi tawk thu a la sawi fo a nih chuan, beiseina tur a tlem hle tawh dawn a ni.