Thla liam ta khan Manchester United academy player thiam bik JJ Gabriel-a aiawhtute chuan Old Trafford chhuahsan an dil hmain United hotute hnenah thil phut hrang hrang an lo siam nual a ni. Tun hnaia kum 16 tling ve chiah he rawlthar hian United-a a hming ziahluhna (registration) tihtawp a dil hnuah club chhuahsan mai a rilruk mek a ni.
United lam hian a ngenna hi lo hnawlsak tawh mah se, Gabriel-a nu leh pate zinga tu emaw zawkin European passport an kawl a nih chuan ram dang club-ah a insawn thei dawn thung a ni. United hian he rawlthar tana first-team panna kawngka hawnsak vekin, club chanchina player naupang ber ni thei tur hialin an lo ruahman tawh a.
A hma pawhin United hian Gabriel-a chelh nan hian theihtawp an lo chhuah tawh a, nikum khan first-team boss hlui Ruben Amorim-a nen an inhmuhtir bakah, Sir Alex Ferguson-a hnenah te an lo inhmelhriattir tawh a ni. Club hotute chuan Gabriel-a hi nakina club hmel hmai thar ber tur a nih theih thu an hrilh a, Michael Carrick-a hnuaiah first-team training-ah an telh fo bakah, pre-season friendly match-ah senior team tan a lo khelhtir tawh bawk.
First-team debut siam ngei tura ngaih a nih laiin, Gabriel-a aiawhtute hian chhuah an dil ta tlat a. Hemi hnu hian Europe-a club lian hrang hrang nen sawizawm ni mah se, tun thlengin khawiah mah a la insawn fel lo thung. He rawlthar aiawhtute'n thil an lo phut tawh langsar zual panga te chu hengte hi an ni:
Pakhatnaah chuan, kumin hian Premier League-ah a khel thei tawh dawn a, Carrick-a hnuaiah Carabao Cup leh Champions League-ah pawh chhawr theih a ni bawk. Mahse, Champions League-ah United-in an player list-ah an telh loh tak avangin Sabah laka an chak ṭum khan a khel thei ta lo a ni. ESPN report danin, United hian Gabriel-a'n tun season-a jersey nambar 77 hak a dilna chu an lo pawmpui tawh a. Red Devils hian Premier League hnenah he kum 16 mi jersey hnungah hian 'Gabriel JR' tih ziah an lo dilsak hial bawk a ni.
Pahnihnaah chuan, season liam ta khan Under-18 Premier League Player of the Season-ah thlan a ni a, kuminah pawh academy-ah a khel chhunzawm leh a. Senior debut siam lo mah se, attacking midfielder hian Under-21 tan match hnih a khelhah goal hnih khungin assist vawi hnih a nei tawh a, UEFA Youth League-ah Sabah lakah Under-19 tan hat-trick a lo siam tawh bawk. Pre-season-ah khan Atletico Madrid nena friendly match-ah a debut a siam a, mahse Gabriel-a aiawhtute chuan first-team training-ah hmun nghet a chan ngei an phut tlat a ni.
Pathumnaah chuan, Sky Sports-in a tarlan danin, pre-season inṭan dawn khan Gabriel-a chhungte chuan Carrington-a Under-21 player dangte ruala training zawm lo turin an hrilh a. First-team squad te chu kar khat hnuah chauh training zawm tura beisei an ni a, academy player dangte ruala training zawm ve kha he rawlthar tan hian a tlawm thlak deuhva an ngaih vang a ni.
Palihnaah chuan, Manchester Evening News-in a tarlan danin, Gabriel-a aiawhtute chuan Sabah, Brighton leh Bournemouth te nena United match khelh turah he rawlthar hian minute 20 tal khelmualah hun a hman an phut a. Sabah lakah khel thei lo mah se, Carabao Cup-ah Brighton lakah a inlan an lo beisei hle a. United hian October ni 25 hian Premier League-ah Bournemouth an hmachhawn dawn a ni. An aiawhtute hian scholarship contract thar chungchang sawi hmain he match pathumah hian Gabriel-a hi khelhtir ngei an phut a, mahse Brighton nen an inkhelh hmain registration tihtawp an dil tak avangin match-day squad aṭangin paih a ni ta zawk a ni.
Pangahnaah chuan, Gabriel-a hian kum 16 a tlin hnu hian United-ah pre-contract a ziak thei tawh a, kum 17 a tlin hnuah professional contract a ziak thei bawk ang. Mahse, a chhuah dil hnu hian Bayern Munich, Real Madrid leh Barcelona te nen sawizawm a ni a. The Times-in a tarlan danin, German club Bayern Munich hian an ngaihven hle na a, mahse a aiawhtute'n hlawh tam tham tak (seven-figure salary) an phut chu pek an inhuam lo thung. United-in a contract tihtawp an remtih loh avangin kumin nipui hma chu England-ah club dang a zawm thei dawn lova, mahse European passport a neih chuan ram dangah a chhuak thei thung ang.
