Manchester United Women chuan tun season-ah bul ṭan ṭha lo em em mah se, an dinhmun an siamṭha chho hle a ni.

Red Devils hi league inelnaa an match hmasaber pahnihah London City Lionesses leh Chelsea lakah an tlawm zawn a. Mahse, khualmualah Arsenal 1-1 in an inhnehtawk pui hnuah confidence rawn nei chhoin, inelna hrang hrangah a zawnin match li ngawtah hnehna an chang ta a ni. Heng an match thlan chhuanawm tak tak zingah hian cup inelnaa Sheffield United 10-1 ngawta an sawp bakah, an elpui lian Liverpool 1-0 a an hneh ṭum pawh kha a tel a ni.

Kumin nipui transfer bazar chhung khan United hian player thar mi pali an lalut a, tlarhma leh tlarhnung lam mual chhunga khel player thum - Rebeca Bernal, Monica Jusu Bah leh Andrea Medina te chuan goal an khung vek a ni. Hemi zinga an player lakluh hlawhtling ber leh thawhhlawk ber chu Atletico Madrid aṭanga a thlawna (free transfer) an lakluh, Spanish star Andrea Medina hi a ni.

A tirah full-back puitling ni ṭhin mah se, United coach Eva Olid chuan Medina hi tlarhma mual veilam (left-wing) ah a chhawr ṭan a, he thutlukna hian rah ṭha tak a chhuah ta hle. Thla liam ta khan West Ham United nen an inkhelh ṭumin mawi takin amah ngawta bawhzuiin (solo effort) United tana a goal hmasaber a khung a ni.

Club official website-in thuchhuah an siamah, "Andrea Medina chuan September thla chhunga Manchester United Women Player of the Month lawmman a phu ngei mai chu a dawng ta," tiin an tarlang. Official website chuan sawi zuiin, "Spanish player hi Reds a zawm tirh aṭangin a che ṭha em em a, kan league match khelh pualiah bul a ṭan vek a, hemi zinga vawihnih chu a mikhual deuhna left-wing position-ah a khel a ni," tiin an tarlang.

Kum 22 mi Medina hi league match-a Arsenal leh West Ham an hmachhawn ṭum khan a zawnin 'Player of the Match' atan thlan a lo ni tawh bawk a ni.

United fan-te vote thawhah hian an player lak thar dang Rebeca Bernal chu pahnihna a ni a, goal khung ngah pawl rawlthar Mared Griffiths chuan pathumna dinhmun a luah ve thung.