Lionel Messi chuan Benin laka goal khat khung leh assist pahnih neiin, a lo tih ṭhin dan pangngaiin ropui takin ram aiawha a match hnuhnung ber a khel a, Argentina tana a hun hman chu a khar ta. Nilaini khan Messi-a'n Argentina tana a match 208-na leh a hnuhnung ber khel zovin, kum 21 chhung zet ram aiawha a lo khelh tawhna chu a titawp a. He a career ropui tak chhung hian Copa América nomawi pahnih leh World Cup pakhat a lakpui bakah, goal 126 lai a thun hman a ni. Hetianga khawvela footballer ropui berte zinga miin ram aiawha khelh a chawlhsan takah hian chibai bukna thuchah a dawng nasa hle a, chung zingah chuan Manchester United defender Lisandro Martinez leh United star hlui Cristiano Ronaldo te thuchah pawh a tel a ni.
A nihna takah chuan, Messi-a'n Manchester United lakah sulhnu ṭha tak a lo nei tawh a. Feet 5 leh inches 7-a sang he 'wizard' hian United lakah match ruka a inlanah vawi thum hnehna changin, vawi hnih a inhnehtawkpui a, vawi khat chiah a tlawm thung. United ṭantute tan chuan Champions League final pahniha an laka a chet dan kha hriat reng a la ni a. Kum 2009 final-ah khan Xavi-a pass ṭha bik lutuk chu tauh kawiin, tlarhnung vengtu ṭha ber pawla ngaih Rio Ferdinand-a leh Nemanja Vidic-a te inkarah goal-ah a thun a. Kum hnih hnuah Wembley-ah United tlarhnung tlawm rawk rawkin ball a khalh tlang leh a nih kha.
United defender Lisandro Martinez leh Cristiano Ronaldo te hian Messi-a nen hian inlaichinna danglam tak ve ve an nei a. Argentina defender Martinez-a'n Messi-a nen hian ram tan hlawhtlinna ropui tak tak an lo ṭawm tawh a, dressing room-ah pawh inlaichinna ṭha tak an nei a ni. Martinez-a'n Instagram-ah video pahnih leh thlalak pali tarlangin, kum 39 mi Messi-a nena an khel dun thei kha a tan thil ropui tak a nih thu a sawi.
Martinez-a'n Messi-a chibai a buknaah, "Khawvel chanchina infiammi ropui ber nena hun kan hmang dun thei kha ka tan chuan thil ropui leh chawimawina lian tak a ni. A ropui ber kan chan ta a, Leo, kan dam chhung hian kan ngai dawn lutuk che a ni. Ka thinlung zawng zawngin ka hmangaih che," tiin a sunna thu a ziak chhuak a ni. Martinez-a'n Messi-a nen hian ram tan match 30 an khel dun hman a, 2022 World Cup, 2021 Copa America leh 2024 Copa America te tiamin nomawi pathum an chawi dun hman a ni.
Chutih laiin, Portugal national team chhuahsantu Cristiano Ronaldo-a leh Messi-a te inkar erawh a danglam thung a, an pahnih hian kum tam tak chhung khawvel hriat hial khawpin an lo inel tawh a ni. An inelna hi Ronaldo-a'n United a zawm tirh aṭanga inṭanin, kum 2009-a Real Madrid a zawm hnu phei kha chuan a sang lehzual hle. Chuti chung chuan, Ronaldo-a'n Messi-a post hnuaiah chuan zahna leh inngainatna thuchah mawi tak a hnutchhiah ve tlat thung.
Ronaldo-a'n, "Leo, kum tam tak chhung i ram tana i lo ding tawh leh i sulhnu hnutchhiah hi a nung reng tawh dawn a ni. Argentina tana i thil lo tih tawh zawng zawngah hian zahna sang ber ka hlan a che. Ka kuah a che," tiin a lo chhang ve a ni.
