January thlasik transfer window inhawng tur hmaah, FC Barcelona leh Spain attacking midfielder Dani Olmo lakluh tumin German club lian Bayern Munich chu offer lian tak thehchhuah turin an inbuatsaih mek nia tarlan a ni. Hemi rual hian Premier League club lian Manchester United pawhin Spain star dinhmun hi uluk takin an enthlithlai mek bawk.

Sky Sports-in thuchhuah a neih danin, Bayern Munich hian thlasik transfer window-ah Olmo hi lakluh tumin hma lak an rilruk a, an tlarhma thuam chak nan kum 28 mi playmaker man atan hian €80million (Euro maktaduai 80) lai thehchhuah an inpeih nia report a ni. Olmo hi German Bundesliga-ah a mikhual lo hle a, Barcelona a zawm hma hian RB Leipzig-ah hun lo hmang tawhin performance ṭha tak a lo phochhuak tawh a ni.

Hemi rual hian, Catalunya club-ah Olmo hi starting XI-ah inlan zui tam hleithei lovin, bul ṭantute zingah a inlan fo lo chungin, Barcelona hotute chuan a man atan hian chhiar sang hle in, lakluh duhtute tan chhiar tlawm an tum lo tih hriat a ni. Olmo man atana an chhiar zat hi a san avangin ngaihven mek tu club-te tan pawh inngaihtuah nawn a ngai dawn a ni.

Premier League club hrang hrang ten Olmo-a dinhmun hi an ngaihven chho hle a, chung zingah chuan Manchester United chu langsar ber pawl an ni. Old Trafford club hian he Spain international hi an midfield leh tlarhma thuam chak nana chhawr theih tur anga ngaiin, an thlithlai reng nia sawi a ni bawk.

Bayern Munich hian an tlarhma tihchak nana an chhawr duha he Spain attacking midfielder hi an peih at tlat avangin, thlasik bazar inhawng turah hian indawrna lian tak a thleng zui thei dawn nia tarlan a ni a, Barcelona lam pawhin sum lakluh nan an hralh phal dawn em tih erawh hunin a la hril ang.