Manchester United-in tun season bul an ṭan ṭhat loh avangin, manager Michael Carrick-a tan international break hi a huna rawn thleng a ni zawk mah mai.
Manchester derby-a an tlawm hnuah, Carabao Cup-ah goal hnih ngawta hma an hruai chungin Brighton an hneh lo leh a, Fulham nen 1-1 a an inhnehtawk zui hnuah inelna chawlh lian hi a rawn thleng a ni. Brighton an hneh loh ṭum khan player-te puk luhna (tunnel) lama an luh laiin Stretford End-a fan-te chu lungawi lo takin an au vawkvawk a, Carrick-a hmakhua chungchangah pawh zawhna a chhuah phah hial a ni.
Carrick-a tana chawlhkar tharte hi a thuk zawka a hmabak hriltu tur a ni dawn. United hi tunah Premier League-ah 12-na dinhmunah awmin, Carabao Cup aṭangin an tla tawh bawk a, hei hian coach tana pressure a tizual hle a ni. Club lian manager nihna atana boruak sang tak awm ṭhin mah se, tlawmna tlem te hian chanchinbumite hnena a hmabak chungchang sawi zui a ti-awlsam ṭhin. Carrick hi mual pawn boruak hmachhawn thiam mi ni mah se, rinhlelhna awm mek tipawh tur chuan result ṭha a mamawh ngei a ngai a ni.
September leh November international break inkar hi Premier League manager tam takte tana hun harsa a lo ni tawh ṭhin a, chuvangin tun kar tawp aṭanga domestic football a rawn kir lehin a team-te an chet ṭhat nghal a ngai tih Carrick hian a hria a ni. Hemi atana a pawimawh ber chu chawlhkar khat leh ni khat (ni riat) chhunga game pathum an khelh tur hi a ni - Inrinni hian Old Trafford-ah Tottenham Hotspur an mikhual ang a, hemi hnu hian Atletico Madrid leh Leeds United te khualmualah an luhchhuah zui ang. Heng match pathumte hian Carrick-a hmakhuaah nghawng lian tak an nei dawn a ni.
Spurs hi kumin nipuiah £334m lai seng mah se, tun dinhmunah Premier League hnuai ber (bottom) ah awmin, league match khat tih lohah goal an la khung lo hrim hrim a ni. Hetiang dinhmuna awm mualneitu tana mahni mual Old Trafford-a hneh loh phei chu United tan chuan hliam na tak a ni ang. Mahse, tluang taka hnehna an chang a nih chuan, khualmual match harsa tak pahnih an hmachhawn hmain phurna leh inrintawkna thar a pe thung ang.
Khualmualah Atletico Madrid chu barakhaih harsa ber tur zinga mi an ni dawn a, La Liga-a pahnihna ni mekin an khelmual Metropolitano Stadium-ah a zawnin an che ṭha hle ṭhin. Mahse, he match hi United tana hmunawl zau zawk neih nan leh counter-attack hmanga chet lak nan a remchang hle dawn a, hei hi Carrick-a hnuaia hnehna ropui ber ber an lo lak tawh ṭhin dan chiah a ni bawk.
Atletico Madrid laka result duhawm an hmu lo a, Tottenham nen an inhnehtawk a nih chuan, Leeds United chuan an khelmual Elland Road-ah chak ngei tumin theihna zawng zawng an rawn chhuah ang. An Farke-a naute hi tun season-ah an che ṭha hle a, Newcastle pawh Elland Road-ah mawi takin an lo sawp tawh a ni.
Match pathum a zawna tlawm chu Carrick-a tan thlan tur a awm lo hrim hrim - chutiang a thleng a nih chuan kawngka rawng a rap dawn tihna a ni. Mahse point 5 vel tal an hmu a nih chuan an boruak a ti-ṭha leh thei thung ang. Tottenham leh Leeds lakah win1 leh draw1 an nei a, Atletico lakah tlawm ta pawh nise, sawiselna awm mek chu a ziaawm ngei a rinawm.
Hemi hnu hian November international break hmain United hian Como (khualmualah), Bournemouth (mahni mualah), Chelsea (khualmualah), Roma (mahni mualah) leh Aston Villa (mahni mualah) an hmachhawn chhunzawm leh dawn avangin, Carrick-a tan he ni riat chhung hian boruak ṭha leh inrintawkna rawn vawrh chhuah hmasak ber a ngai tawh takzet a ni.
