Thla liam ta khan Manchester United rawlthar theihna ngah JJ Gabriel chuan club chhuahsan a dil thut a, hei hian Manchester United chhungril bakah football khawvel pum a thawng hle a nih kha.
Kha thil a thlen aṭang khan Gabriel hian Carrington-a training neihnaah inlan a chawlhsan zui a, a team-mate te a kawm duh tawh loh bakah, Europe club liante nena inbiakna an neih mekte pawh a chak chho tual tual a ni. Gabriel hi kum 16 a tlin chiah bakah Irish passport a neih avangin, ram pawn (Europe) club-te pan theihna dan a nei nghal a, hei vang hian Ineos leh Sir Jim Ratcliffe chuan Old Trafford-a chelh zui theih nan theih tawp chhuahin hma an la ve ta a ni.
United neitu zinga mi Sir Jim Ratcliffe hi club thil relbawlna kawngah a inrawlh vak ngai lo va, a tlangpuiin thutlukna siam chu chief executive Omar Berrada leh director of football Jason Wilcox te kutah a dah ṭhin a ni. Chuvang chuan, khelmual chhung thil leh a bikin kum 16 mi rawlthar chungchangah a rawn inrawlh a nih chuan, hei hian thil pahnih a kawk chiang hle:
A hmasa berah chuan, Gabriel-a theihna leh a ṭhat zia chu Carrington lamah an hai lo hle tih a tarlang a. A pahnihnaah chuan, he rawlthar a chhuah hian Ineos-in United dinthara team pui din an tumna 'project' tlahniam mek lakah nghawng chhe tak a neih theih zia a pholang bawk a ni.
The Telegraph-in a tarlan danin, Ratcliffe ngei hian he rawlthar chelh tum hian hma a la a, Ineos pawhin beiseina tawp nen an theihna zawng zawng an seng a ni. Gabriel hi United 2026/27 first-team thlalakah pawh a tel nghe nghe a, hei hian a hmabak tana beiseina eng a siamsak deuh niin lang mah se, The Telegraph chuan Ratcliffe-a beihna hnuhnung ber pawh hi a hlawhtling dawn lo nia ngaih a nih thu an tarlang thung.
Gabriel-a'n club a dawr dan leh a nungchang avang hian United nena an inkar hi siamṭhat theih a ni tawh lo tlukah an ngai a, a inkhelh leh huna United a hmachhawn a nih pawhin khingpui team aṭanga a inlan a rinawm tawh zawk hle a ni. Kum 16 a tlin hmain United-ah scholarship deal a ziah loh avangin Europe club duh apiang a zawm thei tawh bawk.
Mi ṭhenkhat ngaihdan chuan, he buainaa Ratcliffe-a a rawn inrawlh ve nachhan hi club lam aṭanga Gabriel chelh tura theihtawp an chhuah zia fan-te hmuha pholanna (optics management) mai nia ngai tawk pawh an awm bawk a ni.
