Manchester United rawlthar thiam tak, kum 16 mi JJ Gabriel chuan January transfer bazar inhawng turah a thlawna (free transfer) club chhuahsan a tum mek nia report a ni. Gabriel hian United hotute hnenah a registration chu rang taka tihtawp (cancel) a duh thu a hriattir tawh a ni.
He rawlthar thutlukna hian United hotute a tiphu nasa hle a, thla liam taa Carabao Cup-a Brighton an hmachhawn ṭum khan senior squad-ah telh tur a ni hman a ni. Khelmualah inlan ta se, kum 1956-a kum 16 leh ni 19 mi lek a nih laia debut siamtu David Gaskell-a record khumin, United chanchina khel thei naupang ber a ni hial dawn a ni.
Chuti chung chuan, United chuan Gabriel-a contract-ah hian hun a la bak avangin he buaina hi chinfel leh theih an la beisei fan a. Kum 2010-a piang Gabriel-a registration hi khawi lam ve ve pawh inremna a awm a nih loh chuan tihtawp ngawt theih a ni lo. Mahse, Thawhlehni khan kum 16 a tlin tak bakah, EU passport (Ireland leh UK passport a neih bakah a nu aṭanga Cyprus passport a hmuh thuai beisei a ni) a neih avangin ram dang club-te nen inbiakna a nei thei tawh thung a ni.
Sky Sport Germany-in a tarlan danin, Gabriel hian January transfer window-ah United chhuahsan a duh tih a tichiang hle. Barcelona leh Real Madrid-te chuan he rawlthar hi an ngaihven takzet a, hlawh, bonus leh signing-on fee tam tham tak (XXL package) chhawpsak an inpeih ve ve a ni. Bayern Munich pawhin inbiakna an la neihpui reng a, Paris Saint-Germain pawhin an dinhmun thlithlaiin an lo thlir ve reng bawk.
He rawlthar hma hun sawi rik a nih mek lai hian, international break chhung khan Barcelona-ah training a va nei a, Catalan club hotute nen inbiakna an nei hman bawk. Mahse, Barcelona sporting director Deco chuan he transfer hi thupui zangkhai takah a dah thung. Deco chuan, "He tlangval chungchangah hian sawi tur a awm lo. Kan club nen player sawizawm an awm fo hi chu thil pangngai a ni a, player naupangte tan pawh transfer market hi a lian hle. Mahse, a dinhmun anga awm player hi kan ngaihven rih lo. United player a la ni reng em tih pawh ka hre lo a, keini chu kan inrawlh lo a ni. Hma kan lak hmain a dinhmun a chian phawt a ngai a, rawlthar chungchang sawi hi kan hna a ni lo," tiin a sawi.
United head coach Michael Carrick pawhin Fulham an luhchhuah hmain he midfielder chungchangah hian inbengdai turin a lo ngen tawh a. Carrick chuan, "A la naupang hle a, a chanchin hi sawi vak rih loh a ṭha. A laka pressure thleng thei lakah hian kan fimkhur a ngai a ni. Amah kan ngaihtuah a ngai a, he buaina hi chu a la inrem chho mai ang," tiin a lo sawi tawh bawk.
Gabriel-a'n United tana a match hnuhnung ber a khelh chu thla liam taa UEFA Youth League-ah Sabah laka 5-0 a an chak ṭum kha a ni. A pa leh a aiawhtute chuan Champions League-ah Sabah lakah ngei hian first-team-ah a inlan ve an lo beisei a, mahse United-in squad-ah an telh tak loh avang khan he player leh a chhungte hi an lungawi lo hle a, hei hi chhuah a duh chhan bul ber nia sawi a ni.
