Manchester United-a chanchin thar siam ṭep tawh, kum 15 mi rawlthar thiam bik JJ Gabriel-a chuan kar liam ta khan Old Trafford chhuahsan a dil thut a, club nena an inlaichinna a chhiat tak avangin academy registration tihtawp a ngen a ni.
Carabao Cup-a Brighton an hmachhawn turah Michael Carrick-a'n a squad-ah a telh hman a, inelna tak taka United tana khel thei naupang ber ni tur dinhmunah a ding hman a ni. Mahse, hetiang huna chhuah a dil thut hian United hotute a ti-phu chiang hle.
BBC-in a tarlan danin, Gabriel-a leh a aiawhtute chuan first-team panna tura thutiamte chu tihlawhtlin a ni lo niin an hria a. Pre-season-ah team a zui kual hnem hle na a, Atletico Madrid lakah minute riat chauh senior team tan a khel a ni. Sky Sports-in a tarlan danin, a chhungte leh a aiawhtute chuan season thar a inṭan hnu hian first-team squad-ah hmun chang tam zawk se an ti bawk. September ni 10-a UEFA Youth League-a Sabah laka hat-trick a khung hnu khan United-ah training a la nei leh tawh lova, Barcelona lamah a zin zui a ni. Real Madrid, Bayern Munich leh Paris Saint-Germain te nen sawizawm ni mah se, Barcelona sporting director Deco-a'n he rawtnaah hian Catalan club chu an inrawlh lo tih a sawi thung. United-in an player ṭha ber hi chhuah an la phal lova, inremna siampui leh an la beisei a ni. Tun kar Thawhlehni hian kum 16 a tling dawn a, scholarship ziah theih hun a ni tawh a, professional contract erawh kum 17 a tlin hmain England-ah a ziah theih loh thung.
Gabriel-a hi October ni 6, 2010 khan London-ah a piang a, Enfield-ah a seilian a. A hming tak chu Joseph Junior Andreou O’Cearuill a ni a, a pa, Republic of Ireland international hlui Joe O’Cearuill-a'n an chhungkaw hming chu Gabriel-ah a thlak ta a ni. Kum 10 a tlin hmain YouTube-ah a ball khawih lai video a lar hle a, 'Kid Messi' ti hialin an ko ṭhin. Chelsea, Arsenal leh West Ham academy-ah te a lo awm kual tawh a, kum 11 a nihin kum 2022 khan Manchester United hi a zawm ta a ni.
February 2025 khan England Under-15 tan a debut a siam a, a hnu lawkah Nike nen sponsorship contract lian tak an ziak a. Kum 14 mi chauh niin United Under-18 tan Leeds United lakah a inlan a, goal hnih khungin 13-1 in an chak a ni. Club dang, a bikin Barcelona-in an ngaihven em avangin United director of football Jason Wilcox-a'n inbiaknaah hma a la a, United-a cham turin a thlem lungawi a. Premier League match hmasa berah Arsenal an hmachhawn ṭum pawhin directors' box-ah a chhungte nen sawm an ni hial.
Under-18 campaign a hman ṭan tirhin Derby lakah hat-trick a khung a, match 6-ah goal 7 a thun a. Kum 15 a tlin hnu lawk, October 23 khan senior team training-ah a tel ṭan a, head coach Ruben Amorim-a'n "tlangval theihna ngah tak" tiin a lo fak a, senior team training-a tel hian an chet ran dan leh harsatna awmte hriatthiam nan a puih a rin thu a sawi. November-ah Liverpool laka 7-0 a an chak ṭumin hat-trick a khung leh a, FA Youth Cup-ah Peterborough lakah goal a khung bawk. Sir Alex Ferguson nen pawhin an inhmu hman a ni.
Interim coach Darren Fletcher-a'n Brighton laka chhawr nghal mai a duh lo va, "theihna sang tak nei" tiin fak mah se, senior debut atan chuan "a la hma deuh" tih a sawi. Gabriel-a pa pawhin social media-ah a fapa thlawpin Bukayo Saka chu kum 17 a nih laiin a la ropui bik loh thu leh, a fapa chu Neymar, Lamine Yamal leh Messi te nen a khaikhian hial a ni.
Season liam ta khan Under-18 league-ah goal 23 a khung a, Under-18 Premier League Player of the Season atan thlan a nih bakah, United chanchina Jimmy Murphy Young Player of the Year dawng thei naupang ber a ni a, Angel Gomes-a record a khum a ni. Pre-season-ah Carrick-a hnuaiah Atletico Madrid lakah a inlan a, friendly match-ah ni mah se United senior team tana khel thei naupang ber a ni ta hial a ni. PL2-ah Ipswich lakah goal khat leh assist hnih a nei zui bawk. Ryan Giggs-a'n "generational talent" tiin a lo fak a, Rio Ferdinand leh Wayne Rooney te pawhin he rawlthar theihna hi an lo fak sak nasa hle a ni.
