Manchester United tan international break chhung hian thil thawn thut tam tak a thleng a, chung zingah chuan Leny Yoro-a chet ṭhatna chu a thar ber a ni. Netherlands tana Joshua Zirkzee-a'n chakna goal a khung hnu lawkah, kum 18 mi defender Leny Yoro pawh France senior team tan a vawikhatna atan a inlan ve ta a ni.

Belgium laka hmachhawn harsa tak lakah Yoro hi khelmualah luhtir nghal a ni a, mahse he fiahna lian tak hi hlawhtling takin a paltlang a ni. France hian Belgium hi 4-1 in an sawp a, Yoro hian khelmual chhungah a theihna a pholang chiang hle. A hmachhawn ber chu striker hlauhawm leh chak tak Romelu Lukaku a ni a, hetiang taksa hmanga innuai ching player-te hi United-ah a lo buatpui tawh ṭhin a ni. Mahse, he match-ah erawh Yoro hian Lukaku hi a thunun hneh hle a, inkhelh chhung zawngin hmun a pe tlem hle.

French chanchinbu-te chuan Yoro-a chet ṭhat dan hi an thlir liam mai lo. French chanchinbu lar L'Equipe-in a khel ṭha hle tih tarlangin 7/10 rating an pe a. Match ṭan tir lama goal an chhuah hmasak zawknaah khan Yoro hian tihsual a neih loh thu an tarlang a, tlarhnung venhimna kawnga an rintlak ber a nih thu an sawi hial a ni. Le Parisien-in "Super Costaud" (lungpui anga nghet) tiin a chet ṭhat zia an sawi a, Belgium-in hlauhawm an siam apiangin Yoro hian a lo dang chat zel a ni.

La Voix Du Nord-in phei chuan 8/10 rating pein, "khelmuala player ṭha ber" tiin an thlang hial. France tlarhma lamin goal li ngawt khungin, Michael Olise-a'n goal hnih khungin assist pakhat a nei chung pawha Yoro an thlang bik hi thil danglam tak a ni. GFFN-in 6/10 rating pein, a debut match-ah Lukaku-a hnena ball kal tur zawng zawng a lo dan chah vek thu leh tihsual a neih loh thu an tarlang bawk. Goal France-in 7/10 rating pein, a tlan chakna leh boruaka ball tauh thiamna chu an fak hle a, hei hian Belgium attack zawng zawng titawpin goal zawnah vawi hnih chiah an pet thei a ni.

Inkhelh zawh hnuah Yoro chuan inrintawkna sang tak nen a thusawiah, "Hetiang match hi player naupangte tan chuan hmasawnna tur kawng ṭha tak a ni. Premier League khelh dan nen pawh a inhnaih hle. Hei hian keimahah pawh min ṭanpui ang a, ka theihna zawng zawng mipui hmaah ka pholang thei tawh ang," tiin a sawi.

He a chet ṭhatna hian Manchester United head coach Michael Carrick-a hnenah thuchah a thlen ngei a beiseiawm a. Old Trafford-ah Harry Maguire-a leh Lisandro Martinez-a te chhawr reng lovin, Yoro hi bul ṭantir ngam tawh se tih chu fan-te duhdan a ni chho mek. Maguire-a leh Martinez-a te hi tun season tawpah an cham chhunzawm dawn em tih a chian loh avangin, United hmakhua atan Yoro hi rin ngam a hun tawh hle a ni.