Manchester United academy-a rawlthar rintlak leh beiseiawm ber pakhata ngaih Jay McEvoy chu ram pahnihin an ram aiawh tura an inchuh mek avangin buaina laili-ah a ding mek niin chanchinbu hrang hrang chuan an tarlang.
Kum 2008-a piang he midfielder naupang tak hian khelmuala a thlir thiamna (vision), ball thunun a thiam zia leh a kum phu lova inkhel a thlir thiam dan puitling tak avangin mi tam tak a hip hle a. Chu mai bakah, taksa chakna (athleticism) ṭha tak a neih bakah pressure sang hnuaia a phili ve mai mai lohna hian a kum aiin a puitling zawk tih a tilang chiang hle a ni.
Kum 2024 khan Italian chanchinbu lar Tuttomercato-in McEvoy-a khelh dan hi Barcelona leh Spain legend Xavi nena tehkhinin, "McEvoy hian khelmuala thil thleng leh dinhmunte a thlir thiam em em a, taksa chakna ṭha tak a nei bawk a, hei hian Manchester United tlar laili (midfield) tana player famkim leh hmun hrang hranga chhawr theih a nih zia a tilang," tiin an lo ziak hial a ni.
Kar liam ta khan Under-18 inelnaah Manchester United-in Wolverhampton Wanderers chu 6-0 ngawta an sawp ṭum khan McEvoy-a'n goal a khung a, he match-ah hian United tana goal thumna khungtu a ni.
Daily Mail-in a tarlan danin, Europe rama ram pahnih - Northern Ireland leh Republic of Ireland te chuan McEvoy-a'n an ram aiawh tura thutlukna a siam theih nan theihtawp an chhuah mek a, he rawlthar hian a career-a thutlukna lian tak a siam a ngai dawn a ni. McEvoy-a hian a naupan lai (youth level) inelnaah hian heng ram pahnihte aiawh hian a lo khel tawn tawh ṭhin a ni.
Daily Mail-in a tarlan dan chuan, "Northern Ireland enkawltu Irish FA leh Republic of Ireland football thuneitu FAI te chuan McEvoy-a leh a chhungte hnenah hian an ram aiawh tura sawmna leh ruahmanna ṭha tak an chhawp tawh ve ve a ni," tiin a tarlang.
Thudawnna dangin a tarlan danin, Northern Ireland manager Michael O’Neill-a'n he dinhmun hi a hre chiang hle a, kar lo la awm turah he player leh a chhungte hi hmua inbiakna neih a tum mek a, hei hi FAI laka a kalsawn loh nan leh an lama a awm reng theih nana hmalakna pawimawh tak a ni dawn a ni.
Hemi hnu hian, Manchester United manager Michael Carrick-a leh a player-te chu October ni 10 hian khelmualah an kir leh dawn a, Old Trafford-ah mualneitu niin Tottenham Hotspur-te an mikhual dawn a ni.
