Manchester United legend Nicky Butt chuan head coach Michael Carrick-a'n Matheus Cunha a hman dan chu a sawisel hle a. United hian season liam ta khan Wolves aṭangin Cunha hi an lalut a, a contract-a release clause £62.5million chu pein kum nga daih contract, kum khat dang pawhsei theihna tur nen Old Trafford-ah hian an senglut a ni.
Kum 27 mi Brazil international hian season liam ta khan Manchester United tan bul a ṭan ṭha hle a, Premier League-ah goal 10 khungin assist vawi li a nei a, United hi pathumnaah hruai thlengin Champions League khel turin a tlinpui a ni. Mahse, tun season-ah erawh a chet a hmuhnawm tawk lo hle a. Striker Benjamin Sesko-a hliam avangin Carrick-a'n Cunha hi 'false nine' angin a khelhtir a ngai a, tun season chhungin goal khat leh assist pahnih chauh a la nei a ni.
United tana match 387 lai lo khel tawh Butt chuan "The Good, The Bad and The Football" podcast-ah Cunha hi sir lam (flank) aṭanga khelh tir a fuh zawk thu a sawi. Butt chuan, "Cunha hi striker (No. 9) anga khelhtir hian a theihna a tichhe vek a ni. Sir lam aṭanga a khelh ṭhin laia a chet ṭhatna kha a pholang pha lo hrim hrim. Sesko leh Zirkzee te chauh lo chu striker pangngai kan nei lo a, Zirkzee lah hi a inlan mumal lo hle a. Khelmuala a rawn luh chang pawhin Manchester United striker ni tlak a nihna a pholang pha lo a ni," tiin a sawi.
Tlar laili leh tlar hnung chungchang sawi chhunzawmin Butt chuan, "Midfield-ah player ṭha tak tak kan nei a, mahse inkhel an thunun hneh tawk lo ṭhin. Tlar hnung pali te phei chu tlar hnung satliah (average) tak an ni mai. Right-back hi top two emaw top three emaw thleng thei tur khawpa ṭha a ni em? A ni lo. Harry (Maguire) pawh a vanglai hun a liam tawh a. Martinez hi ball thiam tak ni mah se, tlar hnung laili thunun hneh tak (dominant centre back) a ni lo thung. Luke (Shaw) lah hi match thum emaw pali emaw a khelh hnuah a hliam leh nghal mai a, a rawn kir leh a, a hliam leh ṭhin a ni," tiin United squad dinhmun chu a sawisel hle.
United hian Pathianni khan Craven Cottage-ah Fulham lakah 1-1 in inhnehtawkna an nei a. He match-ah hian United hi an che chhe hle a, a tira tlar hnuai bera awm Fulham lakah 1-0 in an hnufual hman a, mahse minute 89-naah Cunha-a ball pet chu defender-in a lo tihpen (deflected) fuh hlauh avangin goal-ah lutin point khat an hlawhchhuak hram a ni.
Cunha erawh chuan United hian season liam taa an chet ṭhatna aṭang khan phurna thar lain tun season hi an siamṭha leh thei ngei dawn tih a ring tlat thung. Cunha chuan, "Thil ṭha chu a rawn thleng chho leh mai ang. Season liam ta kha ka season hmasaber a ni a, tun season ai hian a buai thlak zawk daih a ni. Kan chungchang sawi a tam em em a, Champions League khel lo tur kan nih laiin tunah chuan kan khel leh thei tawh a. Champions League-a kan match hmasaberah pawh hnehna kan chang a nih kha.
"Khatih lai khan mi ṭhenkhat chuan 'United chu Championship-ah an tla thla ang' te an lo ti hial a, mahse a tawpah pathumna kan ni leh ta nge nge a ni. Keimahni chhungrilah hian inrintawkna lian tak kan la nei a, kan thiltih hi kan chiang a ni. Mahse, hei hi a inṭan chauh a la ni a. Season liam ta khan a hnu lamah hma kan sawn chauh a, pathumna kan ni thei a nih chuan, tun season-ah hian a hma aṭanga hma kan sawn a nih chuan thil ṭha zawk a thleng thei ngei ang," tiin a sawi.
