Manchester United-a Sir Jim Ratcliffe-a larna a tlak hniam chhoh mek laiin, club hnuaia official Muslim supporters' club (MUMSC) chuan Ineos dintu Ratcliffe leh Glazer chhungkua te lakah rinna an nghat tawh lo tih thuchhuah siamin an puangzar ta.
He thuchhuah sei takah hian United neitute hnuaia kum tam tak club dinhmun a tlakhniam dan te, ticket man to lutuk te, Old Trafford chhiat tawh dan leh sum hman khawhral mai mai te chu an lungawilohna chhan lian tak a nih thu an tarlang a ni.
Mahse, kar tawp liam taa Ratcliffe-a'n BBC hnenah interview a pek ṭuma UK buaina lian pahnih—ram dang aṭanga pem lut (immigration) leh sorkar ṭanpuina (benefits) chungchanga thu a sawi avangin, MUMSC thuchhuah thil tum tak chu mipuiin an hriatsual phah deuh a. February thla khan Ratcliffe hian hetiang lam hawi hian ngaihdam a lo dil tawh a nih kha.
MUMSC chuan thuchhuah siamin: "Zirchhuah a neih kan beisei a, mahse a nei lo tih a chiang hle. Tun karah Sir Jim-a'n Britain buaina bulpui berah pem luhna leh sorkar ṭanpuina dawngtute a puh nawn leh a, hetiang buaina hmachhawn tur hian mi 'khauh tawk' an awm lo tiin a sawi a ni. Heng a thusawite hi a pawi kan tiin pawmzam theih a ni lo," tiin an tarlang.
MUMSC chairman Asif Mahmud chuan Manchester Evening News (MEN Sport) hnenah an thuchhuah tum tak chu Ratcliffe-a political ngaihdan mai piah lam a nih thu a sawifiah a. "He lungawilohna hi rei tak a lo inup tawh a, thil thleng thut vanga phili thut kan ni lo. Club neitute kalphungah hian hun rei tak chhung kan lo lungawi tawh lo a ni," a ti.
Mahmud chuan sawi chhunzawmin: "Jim-a a rawn luh tirh khan Manchester tualchhung mi a nih bakah club hmangaih tak tak tu nia a lan avangin kan phur em em a. Mahse Ineos an rawn luh hnu hian manager ban leh lak zut zut te, manager tana ṭanpuina ṭha tawk pek loh te, hnathawkte lungawilohna leh club chhung boruak chhia te a thleng zut a, chu chuan khelmualah nghawng a nei bawk a ni," tiin a sawi.
Nipui transfer bazar khar a nih laia head coach Michael Carrick-a'n player thar a mamawh zat a hmuh loh bakah, derby match-a Manchester City an hneh loh hnu khan MUMSC hian thutlukna an siam ta a ni. Supporters' club dangte pawh lungawilohna lantir rualpui tura an sawm hnuah, chhanna an dawn loh avangin anmahni ngeiin he 'no confidence' thuchhuah hi an thehchhuak ta a ni.
He thuchhuah hnu hian MUMSC hian huatna ṭawngkam (hate mail) te pawh dawng mah se, Mahmud chuan an thil tum ber chu United enkawl dan chhia dodal a nih thu a sawi nawn leh a. Manchester United lamin Mahmud hi be nghalin thil thleng an zawtfiah a, MEN Sport tarlan danin United hian MUMSC official status hi hlihsak an tum lo thung a ni.
Mahmud chuan fan zawng zawngte chu inpumkhat turin a chah a: "Season ticket nei lai ka ni a, Sir Alex Ferguson-a'n a chhuahsan aṭang khan kum 12 chuang Old Trafford-ah inkhel enin ka kal tawh a. Mipui phun thawm hi ka hre reng ṭhin. Fan-te'n aw an chhuah theih loh pawhin supporters' club-te hian an aiawhin aw kan chhuah a ngai a ni," tiin a tlip a ni.
