Manchester United chuan kumin nipui transfer bazar chhung khan an midfield siamṭhat nan sum tam tak (£148.8m) seng mah se, tun season bul an ṭan danah beisei an la phak chiah lo a ni. Casemiro-a contract a zawh hnuah, Ineos chuan midfield thuam chak chu an ruahmanna lian berah an nei a, he hmuna sum thehchhuah hi tihmakmawh a ni bawk.

2026-27 season a inṭan aṭang khan head coach Michael Carrick chuan an player lak thar pathum zinga pahnih chiah a la chhawr thei a. Youri Tielemans chu Andrey Santos aiin a inlan tam zawk a, Brighton aṭanga an lakluh Carlos Baleba erawh chuan transfer tihfel a nih hmaa a kerek a tihhliam avangin United tan a debut a la siam thei rih lo a ni.

Tielemans leh Santos te hian Kobbie Mainoo-a theihna ang hi an la phochhuak pha rih lo a ni. United academy chhuak Mainoo hi tun season-a Carrick-a hnuaia player langsar ber a la ni char char a ni. United midfielder hlui Paul Scholes pawhin Mainoo leh Tielemans te chu an style a inang lutuk a, midfield-ah an che na tawk lo tiin a ngaihdan a lo sawichhuak tawh bawk a nih kha.

Debut la siam lo Baleba-a darah hian beiseina leh phurrit a lian hle a. Brighton aṭanga Premier League club lian bera a inhlangkai hi a dawl zo ang em tih chu hunin a la hril ang. He Cameroon international hian a team tharte nena inelna tak taka match khelh hunṭha a hmu thuai dawn niin a lang a, tun season an khelh dan thlirin Tottenham an hmachhawn hunah chuan midfield-ah Mainoo nena inkawp tura rin a ni. Awmzia chu Carrington-ah a fitness siam ṭhat nan chawlhkar thum lai hun a la nei dawn a ni.

United midfielder hlui Owen Hargreaves chuan 'United! United! United!' podcast-ah Steve Bartram nen an ti ti tlangnaah Mainoo-a khelh dan chu a fak hle a ni.

Hargreaves chuan, "Kobbie-a'n game chhe tak a khelh hi ka la hmu ngai lo reng reng," tiin a sawi a. "A rintlak em em a, ball a neih tawh chuan eng hunah pawh ṭha takin a pass thei a ni. Carrick-a'n ball nena a zia a ṭhat em avanga bul ṭanpuitu atana a duh avangin, tun season-ah hian a hma aia thuk zawkin a khelhtir niin ka hria," tiin a sawi.

Hargreaves chuan Mainoo-a'n game a thunun theih nana zalen taka ball a chan theih nan, a hnung lam aṭanga lo vawnhimtu tur defensive midfielder a mamawh thu a tarlang bawk. International break zawha player zawng zawng an dam kim hnuah United midfield remdan ber tur chu hriat a la ni lo na a, Hargreaves chuan Baleba, Mainoo leh an captain Bruno Fernandes te inkawp chu Carrick-a tan a ṭha ber tura a ngaih thu a sawi a ni.

"Keima khelh ṭhin ang emaw, Casemiro-a khelh ṭhin ang emaw a tlarhnung venhim lam ngaihtuah tlat mi i neih chuan, khatah khan an awm tlat zawk ang," tiin Hargreaves chuan a sawi belh. "Kobbie, Youri, Bruno, leh Andrey te hi player ropui tak an ni vek a, mahse ball an neih laiin an ṭha zual ṭheuh a ni.

"Chutiang kawngah chuan Kobbie hi a che ṭha em em a, midang zawng aiin a langsar fal a ni. Kobbie hi number 8 niin a hma lamah hret khel se, Bruno hi number 10 (attacking midfielder) ah khel se, tichuan Baleba hi number 6 (defensive midfielder) ah lo ṭhu thung se ka duh ber. Chutiang a nih chuan style hrang hlak pathum i nei dawn a ni. Player danglam tak pathum an ni ang: Baleba chu tha leh taksa chakna hmang mi a ni a; Kobbie chu ball pe kual zung zung thei leh tlarhnung leh tlarhma inkar zawmtu a ni a; Bruno chu chance siamtu ber a ni thung ang," a ti.

Midfield lailia Baleba-a rawn inlan hian hnehna chan harsa ti ṭhin United team hi a siamṭha thei dawn em tih chu hunin a la hril ang.