Manchester United chuan stadium thar sak an tumna kawngah hma an sawn zel a. Kum 2024-a INEOS-in club thuneihna an chan khan, stadium thar sak hi an ngaihpawimawh hmasak ber tur zinga mi a nih thu an lo puang tawh a ni. Stadium thar sak theih dan tur ngaihtuah tur hian task force an din a, a tawpah chuan tuna an hman lai Old Trafford bul lawkah hian mi 100,000 lenna tur stadium thar sak chu club tan a ṭha ber dawn tih thutlukna an siam ta a ni.

Sir Jim Ratcliffe-an he stadium thar tur hi "Wembley of the North" tiin a lo sawi tawh a, England ram tana stadium pawimawh ber Wembley tluk thei tur khawp khelmual ropui din a duh a ni. He project lian takah hian harsatna eng emaw zat an tawk tawh a, a bikin stadium sakna tur hmun hma (land) lei chungchangah hian an tlai deuh a, mahse kumin tir lam khan he harsatna hi an chingfel thei ta hlauh a ni. Chu mai bakah, he project-a architect lian ber tur atan Foster and Partners chu an thlang fel tawh bawk nia report a ni.

The Sun chanchinbu-in United fans-te tana chanchin lawmawm tak rawn tarlangin, "Manchester United chuan £2 billion zeta to tur stadium thar sak an tumnaah hma an sawn leh ta hle a ni. Red Devils hian kum 2024 tir lam khan mi 75,000 lenna Old Trafford thlak tur hian mi 100,000 lenna tur stadium ropui tak sak an lo rilruk tawh a ni," tiin a tarlang.

He project kalpui theih nana thil pawimawh tak pakhat chu tualchhung thuneitute (council) mipui rawnna (public consultation) an neih ṭhenkhat an zawhfel tak hi a ni. United-in stadium sak phalna (planning permission) an dil hmain, tualchhung mipuite lungawina leh ngaihdan lak hmasak phawt an duh a ni.

Kumin July thla aṭang khan Trafford Town Hall, Media City, Gorse Hill Studios leh Metro Sports Club-ah te tualchhung mipuite ngaihdan lakna hun hi buatsaih a ni a, mipui tam takin online lamah pawh an ngaihdan an sawi bawk. Heng inbiakna leh rawnna neihna hmun tinah hian United hotute an tel vek a, inbiakna hrang hrang neih a nih hnuah hian an ruahmanna hi kawng dik takah a kal chho mek nia ngaih a ni.