Manchester United aṭanga club danga loan-a chhuak player pahnih Dan Gore leh Jayce Fitzgerald te chuan Thawhlehni zan inkhelah an theihna phochhuakin an che ṭha hle.

Red Devils hian season tin an lo tih ṭhin tawh angin, an rawlthar theihna ngah tak takte'n senior football tawn hriat ṭha an neih theih nan leh an puitlin chhoh theih nan hnuai lam league (lower leagues) a club hrang hrangah loan-in an chhuahtir ṭhin a ni.

Season liam ta khan Rotherham United chu an tlak hnuah pawh Dan Gore hian an tan loan-in season ṭha tak a hmang a. Kumin nipui chhung khan he midfielder hian loan bawk hmangin Luton Town a zawm leh a, Kenilworth Road lamah hian tluang takin a insiamrem chho mek a ni.

Ipswich Town under-21 laka Luton Town 6-0 a an chak ṭum khan Gore hian minute 80 chhung khelmualah hun a hmang a. He match-ah hian pass pawimawh (key pass) vawi khat pein a team tan assist a nei a ni. Chu mai bakah, Gore hian chance ṭha tak (big chance) vawi khat a siamsak bawk a, mahse a khelhpuite'n an khung zo lo thung. Ball thunun chungchangah Gore hi a rintlak hle a, pass vawi 90% zet a hlawhtling a, Hatters-ten ball an inpe kual theih nan hmun pawimawh tak a luah a ni.

Shot leh dribble lamah inrawlh lo mah se, Gore hian midfield lailiah hna ropui tak a thawk a; tackling-ah 100% hlawhtlinna neiin, ground duel vawi 6 a neih zinga vawi 4-ah hnehna a chang a ni. United academy chhuak midfielder hian ball chhuhsak (interceptions) vawi 2 leh clearance vawi khat a nei bawk. Luton Town leh Gore-a te match lehpek tur chu October ni 3 hian Colchester United nen a ni ang.

Chutih rualin, United rawlthar dang Jayce Fitzgerald pawh Rotherham United tan a che ṭha hle a. York City nen 1-1 a an inhnehtawk ṭum khan minute 90 a khel tluan thak a ni. Match zawha penalty shootout-ah Fitzgerald hian goal khungin, Millers chuan 5-4 in hnehna an chang ta a ni.

He match-ah hian Fitzgerald chuan pass vawi 82% a hlawhtling a, long ball vawi 3 a vawrh luh zinga pakhat chu a team thiante hnen a thleng bawk. Midfielder hian goal zawnah shot vawi 3 zet neiin, tackle vawi 3 a la hlawhtling a. Inkhelh chhungin ground duel vawi 6 ngawt chuh tlingin khelmual lailiah tha a thawh hlawk hle bawk a ni. Fitzgerald-a te hian an match lehpek chu Inrinni chawhnu hian Crewe Alexandra lakah an hmachhawn ang.