Manchester United-in an rawlthar theihna ngah tak, kum 15 mi JJ Gabriel-a chhuak lo tura an chelh duh a nih chuan kar hnih chiah hun an nei tawh. He rawlthar hian tun thla tir khan United hotute hnenah a registration tihtawp (terminate) a dil thut avangin club a thawng hle a ni.
Gabriel-a hian Carabao Cup-ah Brighton lakah Manchester United senior team tana a debut match khel turin beiseina a nei sang hle a, mahse he chanchin lungchhiatthlak tak a thlen hnu hian squad aṭanga paih a ni ta zawk a ni. Hemi hnu hian United youth team hrang hrangah a la inlan leh miah lo a, Spain-ah thlawkin Real Madrid leh Barcelona te nen inbiakna an nei mek nia report a ni.
Kumin October ni 6-ah Gabriel-a hi kum 16 a tling dawn a, hemi hnu hian dan angin agent a nei thei tawh dawn a ni. Chu mai bakah, Irish passport a neih avangin ram dang club a zawm thei nghal dawn a, super-agent hmingthang Ali Barat leh Jorge Mendes te pawhin he rawlthar hi an aiawh (represent) tumin an ngaihven hle a ni.
United hotuten he rawlthar hi a hmasawnna atana hmun ṭha ber an nih thu hrilha hmin leh an la inbeisei hle a, mahse tun hnaia United chet chhiat chhoh zelna hi Gabriel-a'n chhuah a duhna chhan ber a ni thung. Old Trafford hotuten he rawlthar contract, tun season tawpa tawp tur hi, awlsam taka tihtawp sak an tum lo hle.
United-in a contract hi an tihtawp sak a nih chuan, zangnadawhna (compensation) £300,000 chauh an hmu dawn a, he player hi nakin lawka pound maktaduai tam tak man thei tur a nih avangin an tan chan ropui tak a ni thei a ni. Hemi rual hian Gabriel-a'n Premier League emaw FIFA hnenah emaw zualkoin, United aṭanga chhuah zalenna a dil thei bawk.
A bikin Barcelona leh Real Madrid aṭangin dawrna ṭha tak a dawn mek lai hian, a kum a la naupan em avangin a chhungkuain hmun dang pan an duh a nih chuan United tan dan a harsa hle dawn a ni. FIFA danah player naupangte zirna chungchangah tehkhawp khauh tak awm mah se, in lama zirtirna (home-schooling) hmangin he dan hi an pumpelh thei dawn a ni.
Kar hnih chhung zet chu Gabriel-a hi United-ah a inlar tawh lo a, club chhuahsan turin a inpeih tawh hle nia hriat a ni. Chutih rualin Manchester United-in an player naupang welfare (ṭhatna leh hriselna) chu an dah pawimawh ber tih an sawi thung a ni.
