Manchester United nena an inremna neih lai tihtawp diltu rawlthar kum 15 mi JJ Gabriel chuan, club chhuahsana hmun danga insawn a tum kawngah super agent Ali Barat leh a agency Epic Sports chu a aiawh turin a thlang fel ta niin an tarlang.
Nakin lawka Ballon d’Or hial la thei tura ngaih Gabriel hian, United tan senior match vawikhat mah khel lova Old Trafford a chhuahsan mai dawn niin a lang a, hei hi club tan chuan thil pawi tak a ni. A pa chuan manager Michael Carrick-a hnuaia a fapain hun ṭha a chan hun nghak zo lovin, Europe khawmualpui lam pan se Gabriel-a hmasawnna atan a ṭha zawk ang tiin a ngai nghet tlat a ni.
Gabriel-a'n United chhuahsan a duh tih Europe club lianten an hriat takah chuan, he rawlthar theihna sang tak mai hi chang tumin inbiakna an nei nghal sup sup a. Thutlukna tawp an siam hmain Real Madrid leh Barcelona te pawh lo inrawlh tawhin inbiakna neihpui tura ngaih an ni bawk. Kum 16 a tlin hma chu dan ang takin scholarship contract emaw agent a inziahpui theih loh avangin, kumin October 6-a kum 16 a tlin hunah thutlukna puitling a siam chauh dawn a ni.
German journalist Christian Falk chuan Gabriel hian agent lar Ali Barat chu a aiawh atan a thlang fel tawh niin YouTube channel JijantesFC hnenah a tarlang a. Falk chuan, "Thutlukna siam tawh chu Gabriel hian Manchester United a chhuahsan ngei dawn a, Premier League a chhuahsan bawk ang. October ni 6 khian kum 16 a tling dawn a, hemi hunah hian thutlukna a siam thei ang. Thutlukna pakhat chu nikum lama 'agent of the year' dawngtu Ali Barat-a agency 'Epic' hi a zawm ang a. Hemi hnuah hian a hmabak tur atan thutlukna an siam chho ang. Thutlukna hmasa ber erawh United a chhuahsan dawn tih a chiang sa a, club lian tak takte aṭangin ngaihvenna a sang hle a ni," tiin a sawi.
Barcelona lam chuan Gabriel-a chungchangah inhnamhnawih loh an tum deuh nia sawi ni mah se, agent Barat leh Barca sporting director Deco te inkarah inlaichinna ṭha tak a awm thu Falk hian a sawi tel bawk.
Chutih rualin Aston Villa leh Liverpool CEO hlui Christian Purslow chuan he rawlthar hi Barcelona pan chungchangah a lo vawrh vawng tawh a. Kum 16 a nih laia West Brom chhuahsana Barcelona lo zawmtu Louie Barry-a chanchin hrechhuak turin thurawn a pe a ni. Barry pawh khan kum 16 a nihin Barca a pan a, mahse thutiamte hlen a nih loh bakah ram dang tualchhung khawsak danah a buai em em a, a tawpah thla hnih hnu velah Aston Villa lamin an la let leh ta nge nge a nih kha.
Purslow chuan The Football Boardroom hnenah sawiin, "Louie Barry kha Barcelona-ah a kal a, khatih lai khan PSG dawrna pawh a lo hnawl a ni. A record ka en khan England under-14, 15, 16 huangah Michael Owen-a dawtah chuan goal khung hnem ber a ni. Naupang theihna nei ropui tak a ni a, West Brom chhuahsana Barcelona a pan hnu thla hnih velah ka hmu leh a. Birmingham rawlthar kum 16 mi tan Barcelona-a khawsak harsa a tih zia ka hria a, an thutiam leh beiseina tam tak chu a thleng dik ta lo a ni. Tichuan rang takin Villa-ah kan la lut leh ta a ni. Chuvangin JJ Gabriel pawh hian ram pawn club lian zawm chungchangah hian fimkhurna lian tak a neih a ngai a ni," tiin a sawi.
United academy-ah hian player theihna nei ṭha tak tak an la tam a, coach-te pawhin hma an sawnpui zel dawn tho na a, senior squad-a Gabriel-a a inlan hman hma hauhva United chhuahsan a ngen ta mai erawh Manchester United tan chuan thil pawi tak a tling a ni.
