Manchester United head coach Michael Carrick chuan zanin hian Champions League inkhelah Atletico Madrid tlawha an zin chhuah dawn avangin pressure sang tak a hmachhawn mek a ni. United hian tun season Champions League match hmasa ber an khelh hnu khan chak an la nei leh miah lo a, kar tawp liam ta khan Premier League-ah Tottenham Hotspur chu 1-1 in an lo inhnehtawkpui tawh bawk.
Team chet ṭhat theih nan Carrick hian a squad-ah inthlakthlengna a siam ngei a beiseiawm a. Mahse goalkeeper lamah erawh inthlakthlengna a awm a rinawm loh a, Senne Lammens chuan a dinhmun a humhim chhunzawm ang. Lammens hi first choice ni nghet hle mah se, Atletico ang team ṭha lakah chuan a ball sem chhuah (distribution) kawngah a fimkhur zual a ngai dawn a ni.
Inrinni khan Carrick chuan Diogo Dalot aia Leny Yoro right-back-a a luhtir thut khan mi tam tak a ti-bangbo a. United tactics leh game plan vanga hetianga thutlukna siam a nih thu tarlan niin, Spain mualah pawh Yoro hi a chhawr chhunzawm leh a rinawm hle. Chutih rualin Luke Shaw aiah Dalot hi left-back lamah Carrick hian a ko kir maithei bawk.
Midfield lamah Kobbie Mainoo a inlan thei dawn lo a, a hmunruak luah tur hian Mason Mount leh Andrey Santos te chu an in-chuh ang a, Santos hi bul ṭan tura rin zawk a ni. Inrinni khan Youri Tielemans chu bul ṭantir ni mah se a talbuai deuh avangin, Brighton aṭanga an lakluh Carlos Baleba chu a vawikhatna atan bul ṭantir a phu tawh hle a ni. Captain Bruno Fernandes pawh Ipswich Town laka a khelh ṭhat em em hnuah a theihna sang a la pholang leh meuh lo na a, mahse hetiang inkhel lian thamah hi chuan Carrick hian bench-ah a dah a rinawm loh a ni.
Tlarhma lamah Benjamin Sesko a la inhliam zel avangin Bryan Mbeumo chuan tlarhma a ho leh ang. Mbeumo hian pre-season-ah Atletico lakah goal hnih a lo khung tawh a, mahse zanin inkhel erawh fiahna khirh zawk a ni ngei ang. Right wing-ah Amad chuan tun season-a a match hmasa berah hliam nei lovin a khel thei a, bul a ṭan chhunzawm leh tura ngaih a ni.
Mual veilamah Spurs laka bench aṭanga rawn inlan Marcus Rashford chu bul ṭan tura koh luh a nih beisei a ni bawk. Matheus Cunha chuan Spurs laka Mbeumo-a goal khung tur a siamsak bak kha inkhelah thawhhlawkna lian a nei meuh lo a, Brazilian forward hian a club hlui Atletico lakah hian bench aṭanga inkhelh a ngaih hmel hle a ni.
