Champions League-ah Manchester United chuan khualmualah Atletico Madrid an hmachhawn dawn a, he match pawimawh takah hian United chuan an player paruk ngawt mai an chhawr thei dawn lo a ni. Mualneitu Atletico Madrid lam chuan hliam nei mang lova squad kim ṭha tak an neih laiin, Michael Carrick-a enkawl Manchester United erawh hliam vanga buaina an tawk chho mek thung.
Tottenham Hotspur an hmachhawn ṭum khan Amad chu khelmualah a rawn kir tawh a, centre-back Matthijs de Ligt pawh Spanish khawpui Madrid pan tur hian squad-ah a tel ve bawk a, goalkeeper Tom Heaton pawhin training a zawm leh tawh bawk. Mahse heng player-te rawn kir rual hian United hian hliam thar dang an nei zui leh ta hlauh thung a ni.
Spurs nena 1-1 a an inhnehtawk ṭum khan left-back Luke Shaw chu second half added-time minute ruknaah lakchhuah a ngai a. England midfielder Kobbie Mainoo chuan he match hi khel tluan mah se, Thawhṭan zing training-ah a tel ve thei ta bik lo a, Shaw-a zuiin a inlan thei dawn ta lo a ni.
Madrid an thlen hnu lawka chanchinbumite a kawmnaah Michael Carrick chuan, "An rawn zin ve lo a, Inrinni match-ah khan an pahnih hian harsatna an tawk ve ve a, an dinhmun kan enfiah mek a ni. Tun dinhmunah chuan naktuk match atan an la inpeih rih lo," tiin a nemnghet.
Shaw leh Mainoo bakah hian striker Benjamin Sesko, defender Noussair Mazraoui leh Patrick Dorgu te pawh Thawhṭanni session-ah khan an tel lo a. Carrington lamah khup zai hnu inenkawl mek Manuel Ugarte pawh a la inlan thei lo bawk. Dorgu leh Mazraoui te hi ram tana an khelh laia hliam tuar an ni a, Dorgu hi Denmark tana a inlan laiin a inhliam a, Mazraoui pawh Morocco tana a khelhna lamah a inhliam bawk a ni.
Spurs an hmachhawn hma khan Carrick chuan anni pahnih hi an chawlh a ngaih tur thu a lo sawi tawh a, "Patrick kha lakchhuah a ni a, chawlhkar engemaw zat chu a chawlh a ngaih hmel. Nous pawh kha a khawlo deuh a, a dinhmun kan la thlithlai zel ang," a lo ti tawh a ni.
Sesko-a khingkhal (shin) hliam chungchang sawiin Carrick chuan, "A hma ami nena inang deuh a ni a, mahse a thuhmun chiah erawh a ni lo. Eng chen nge a buai dawn tih hriat tumin kan la buaipui mek a ni. A tir ami aṭang khan a dam chhuak ṭha hle a, mahse a chang chuan taksain hetiang hi a tawk ve ṭhin a ni. Hemi atan hian hma kan lak a, a rang thei ang bera kan koh kir leh theih nan kan buaipui a ngai a ni," tiin a sawi bawk.
Player eng emaw zatin match an hmaih dawn chung pawhin, United squad an beitham phah loh thu head coach hian a sawi a, "Player indaih lohna kan nei lo e. Hliam vanga inlan thei lo player eng emaw zat an awm ngei mai, mahse squad tlem lutuk kan ni lo," a ti nghet charh.
De Ligt leh academy defender Dan Armer te Madrid pana an zinkawnga an tel ve theih dan sawiin Carrick chuan, "Dan tan hemi huanga a tel ve theih hi thil ṭha tak a ni a, rawlthar dangte pawhin match hmachhawn tura inbuatsaihna boruak an hriatthiam ve theih nan a ṭangkai hle a ni. Matta (De Ligt) a rawn kir leh thei hi a lawmawm hle bawk. Dawhthei takin kan nghak a, he dinhmun thleng tur hian kan thawkrim hle a ni. Zinkawng thui tak a zawh hnuah kan zingah a rawn tel leh thei hi kan lawm takzet a ni," tiin a sawi zui bawk a ni.
