2026/27 season in-ṭan aṭanga match riat (8) chauh a la liam tihah, Manchester United head coach Michael Carrick chuan a hma hun humhim turin a beih a ngai ta ran mai. Old Trafford-a Inrinni match-ah Tottenham nen 1-1 in an inhnehtawk a, Dominic Solanke-a'n hurt-time-ah goal a rawn khung hnuah inkhel tawp thleng maiin mipui lamin Carrick-a team te hi an au el ta hial a ni.

He inkhelah hian United game a ṭha lo hle a, mipuite an lungawi loh em avangin Madrid pana thlawk chhuak United fan-te pawhin Carrick-a thlaktu tur chungchang an sawi zui nual tawh a ni. Kum 45 mi Carrick-a tan hian a thawkrimna leh season liam taa United a vawi thumna a nihpui hramna te chuan a dinhmun a humhim reng thei tawh bik lo nia lang a ni.

United hian ṭan lak an mamawh takzet laiin, hmabak khirh tak tak an hmachhawn a ngai dawn. Champions League inelnaa khualmual match an khelh hnuhnung ber (November 2023-a Erik ten Hag-a hnuaia Galatasaray 3-3 a an neih hnu) hnua a vawikhat nan Europe inelnaah khualmual khel turin Atletico Madrid an pan a ni. Metropolitano Stadium-a Atletico hmachhawn hnu hian, Premier League-ah an elpui lian Leeds United chu Elland Road-ah an luhchhuah leh dawn bawk a, a zawnin khualmual match thum ngawt an khelh a ngai dawn a ni.

Carrick-a ruahmanna — ball pass tam a, game thunun tumna hian Premier League-a tharum hmanga inkhelh takah hian buaina a thlen hle a. Spurs laka an inkhelh ṭum pawhin midfield-ah United hi an chungnung lo hle. Match neih hmaa a tarlan intihchakna (fire) chu khelmualah hmuh tur a awm lo hle a ni.

Atletico hmachhawn tura Madrid a thlen hnuah pre-match press conference-ah Carrick chuan, "Hun a kal ṭhat loh hian chhiatna thleng anga ngaihna lian tak a awm ṭhin a, hei hi ka hrethiam e. Mahse ka rilruah chuan chutiang a awm ve lo. Harsatna awmte hi kan paltlang a, kan hmachhawn a ngai a ni... Hetiang dinhmun hi kan paltlang ngei ang tih ka ring tlat a ni," tiin a sawi.

Thla ruk liam ta kha chuan Carrick-a hian United tan thil dik tak a ti chho zaitin a ni a, match 17 a khelhah ṭum hnih chauh tlawmin, season liam taah United chu Champions League khel thei turin pathumna a nihpui a nih kha. Mahse tun season bul ṭan dan thleng hian United supporter-te dawhtheihna a zawh phah chho mek a, tun kar chhunga match pawimawh an hmachhawn tur hian United-a a hma hun a hril thuk tawh hle dawn a ni.