Manchester United captain Bruno Fernandes chuan tun season-ah an club lamin bul ṭan ṭha tawk lo mah se, amah mimal erawh a khel ṭha chho hle.

United hi tun dinhmunah Premier League table-ah 12-na dinhmunah an awm mek a, EFL Cup aṭangin an tla fel tawh bawk a; mahse, Fernandes erawh chuan Ipswich Town laka hat-trick a siam telin goal li (4) a khung tling tawh a ni.

He Portugal international hian nizan lam khan Nations League inelnaah ram tana inlan lehin, Wales laka 1-0 a an chak ṭum khan bul a ṭan a. Manager thar Jorge Jesus-a hnuaiah Fernandes hi a khelh ngai meuh lohna hmun, midfield veilam sir (left of midfield)-ah chhawr a ni a. Hetiang dinhmun bumboh deuhvah hian khel mah se, United captain hian key pass vawi nga (5) ngawt pe chhuakin, pass hlawhtling zaa 86 (86%) lai a nei thei a ni.

Inkhelh zawha press conference-ah manager Jorge Jesus chuan Fernandes chu he position-ah hian Wales laka a khelh ai hian nakin lamah chuan "a la khel ṭha lehzual thei" tih a sawi chhuak a ni.

Portuguese chanchinbu Record-in a tarlan danin, match zawhah Sport TV hnenah Fernandes hian a coach-in a khelhna hmun tur a thlan chu a chhanletna a nei zui ve thung a ni. Fernandes chuan, "Min lo chik a nih chuan, mual sir (wing)-ah khan ka awm tam meuh lo a ni. Tlarhnung venhim hna ka thawk a, full-back ka mark a, khelmual hma lamah ka nawr (press) bawk a ni," tiin a sawi.

A sawi zawmnaah kum 32 mi hian, "Chu bakah chuan coach-in a thil thlir dan leh duh dan ang thlap a ni: laili lam aṭanga ball in-pass kualpui thiam, tlarhnung aṭanga nawr chhoh theih nana rawn tawlh hnung ṭhin, centre forward leh second striker te pui kawp thei, laili leh sir lam inkara triangle siam a, khelmual sir tawn tawn ṭanpui thei tu player neih kha a duh a. Chu tak chu khelmuala ka thiltih chu a ni," a ti bawk.

Fernandes chuan manager thar Jesus hian national team a enkawl chhung hian position leh mawhphurhna hrang hrangah chhawr a tum tih a sawi bawk a. "He match atan hian he hmunah hian khel turin coach-in min ngen a ni. A hnuaiah hian hmun hrang hrangah ka khel thei dawn tih min hrilh tawh bawk a, chuvang chuan keima tan chuan team ṭanpui theihna a nih phawt chuan a pawimawh ber a, coach-in min dahtirna hmun apiangah ka theih tawp ka chhuah zel ang," tiin a sawi zui a ni.

Fernandes leh a thiante hian Pathianni lo thleng tur hian Norway an hmachhawn leh nghal dawn a. Chumi hnu karleh Ningani zanah chuan a club-a a khelhpui Patrick Dorgu-a awmna Denmark an hmachhawn chho leh bawk ang.