Manchester United chuan tun season bul an ṭan dan a fuh loh chhunzawm zel avangin, international break chhung hian head coach Michael Carrick chuan ngaihtuah tur tam tak a nei dawn ta a ni.
United hian season thar bul an ṭan ṭha lo hle a, inelna hrang hranga match ruk an khelh tawh aṭangin vawikhat chiah hnehna an la chang a, Premier League-ah 12-na dinhmun an luah mek a ni. Manchester City, Hull City leh Brighton lakah an tlawm tawh bakah, Pathiannia Fulham nena 1-1 a an inhnehtawk ṭum pawh khan hun tawp dawn lamah Matheus Cunha-a'n siphurh a sut hram avangin point khat an hlawhchhuak thei chauh a ni. Season liam ta chawhnu lama an chet ṭhatna kha an hloh chho mek a, Carrick-a lakah pawh beiseina leh phut a sang chho hle.
Khelmual chhung chauh ni lovin khelmual pawn lam thil pawhin United boruak hi a tibuai chho hle a. Carrick-a squad chu hliamin a tibuai chhunzawm reng a, striker Benjamin Sesko chuan chawn ruh hliam vangin harsatna a tawk thar leh a, an academy starlet kum 15 mi JJ Gabriel-a transfer boruakin club chhung a tibuai bawk.
Thudawnna thenkhatin an tarlan danin, JJ Gabriel hian Old Trafford chhuahsanna remchanna a hmu a nih chuan Spain ram pan a duh a ni. Kar liam ta khan he rawlthar hian United player zinga a inziahluhna (registration) hlihsak (deregister) turin ngenna a thehlut a, hei hian thawm a ti ring hle a ni. Gabriel hi United academy chhuak zinga beiseina ngah berte zinga mi ni mah se, club-a a hmabak tur erawh a chiang lo hle ta.
Spain chanchinbu Sport chuan Gabriel hian club pan theih tur paliah a mit a len mek niin a tarlang a, chung zinga pahnih chu Spain club lian Real Madrid leh Barcelona te an ni a, Bayern Munich leh Paris Saint-Germain te pawhin a dinhmun an thlithlai reng bawk. Gabriel hian Old Trafford aṭanga chhuah theih dan zawngin agent Ali Barat chu a ruai tawh nia tarlan a ni a, Barat hian Real Madrid leh Bayern te nena inbiak pawhna siam kawngah ṭangkaina a nei tawh nia hriat a ni. Mahse Gabriel hi tun season chhung atan chuan United player angin a la inziak lut tlat a, deregister mai theih a ni lo. Club hotute pawhin he buaina hi inrem taka chinfel theih an la beisei fan a ni. Gabriel hi October ni 6 hian kum 16 a tling dawn a, scholarship contract ziah theihna hun a nei ṭep tawh a, kum 17 a tlin hunah professional contract a ziak thei chauh thung ang.
Striker Benjamin Sesko pawhin a chawn ruh hliam a tawrh chhunzawm zel avangin khelmual chhuahsan a ngai leh a, a damchhuah thuai theih nan theihtawp a chhuah mek thu a sawi. Kum 23 mi hian Fulham an hmachhawn ṭum khan a inlan thei lo a, Slovenia national team squad aṭang pawhin a inhnukdawk zui bawk.
Sesko chuan Thawhlehni khan Instagram kaltlangin thuchhuah siamin, "Ka ram squad-a match lo awm turte ka khel thei dawn lo hi pawi ka ti takzet a ni. Slovenia tan hian thinlung leh induh tawkna nen ka khel reng ṭhin a, ka khel zel bawk ang. Tun dinhmunah chuan ka damchhuah leh vat theih nan rilru sawrbing a pawimawh ber a ni. Ka ram leh ka club tana theihtawp chhuah leh vat turin khelmuala luh leh theih thuai nan ka inpuahchah mek e," tiin a sawi.
Sesko hi tun season-ah match khat tih lohvah chuan United tan a inlan vek a, Everton nen 2-2 a an inhnehtawk ṭum khan bench aṭanga rawn lutin goal a khung a, Azerbaijani club Sabah 4-0 a an sawp ṭum pawhin goal thumna a khung bawk. Mahse Premier League-ah chuan Matheus Cunha chuan bul a ṭan ziah avangin, Sesko hi substitute lamah a awm zawk tlangpui a ni.
