Manchester United chuan tlar laili leh tlarhma lam an thuamṭhat hnuah, an tlarhnung (defense) thuamṭhat leh zual chu an hmachhawn leh tur a ni a. Head coach Michael Carrick-a'n tlarhnung tana a hman tam berte hi kum li liam ta, kum 2022-a Erik ten Hag-a hnuaia 4-0 ngawta an tlawm ṭuma tlarhnung mi pali bawk kha an la ni reng hi thil mak tak a ni.

Harry Maguire, Lisandro Martinez, leh Luke Shaw te hi an chet chhiat fo tawh avangin rin ngam an ni tawh lo hle a. Matthijs de Ligt chu fit ṭha nise bul a ṭan ngei tur a nih laiin, kum khat dawn zet chu hliam vangin a chawl tawh thung a, Leny Yoro leh Ayden Heaven te erawh rawlthar chauh an la ni thung.

Maguire leh Martinez te contract hi tun dinhmunah tawp mai tur a nih laiin, Graeme Bailey-a report danin, kum 21 mi Leny Yoro pawh hian kumin hian club a chhuahsan ve mai a hlauhawm hle. United hian an tlarhnung hmakhua tur an thlir mek a, he French defender hian a season thumnaah hmasawnna a lantir lo a nih chuan hralh chhuah mai an rilruk tawh a ni.

Carrick hian Yoro-a theihna hi ring tawk viau mah se, khelmualah a chhawr tlem lutuk a, a ṭhanlen theih nan loan-a chhuahtir zawk tur a nih laiin club-ah a chelh tlat a ni.

Yoro hi Sabah laka an inkhelh ṭum khan a che ṭha hle a, derby match-ah pawh bul ṭan phu hle mah se bench-ah dah a ni leh daih a. Hemi hnu hian Brighton lakah Heaven nen inkawpin an chesual a, Fulham lakah phei chuan a inlan leh ta miah lo a ni. Chutih laiin, Maguire leh Martinez te erawh an che chhe hle chung pawhin Carrick hian a thlang tlat reng thung.

United-in tun season-a goal an chhuah loh (clean sheet) vawikhat chiah an neih pawh kha Yoro a inlan ṭum chiah kha a ni a, hei hian Martinez nena inkawp turin Yoro hi chhawr nawn leh tlak a nih zia a tarlang chiang hle.

Yoro hi Ineos-in United an enkawl hnua an player lak thar langsar ber leh Real Madrid laka an chuh chhuah, an hun thar (era) hrilfiah tur khawpa beiseina sang chunga £51m zeta an lakluh kha a ni a. Mahse, a season hmasaberah hliam vangin a che hleithei lo a, hemi hnu hian hunṭha a hmu zui mang lo a ni.

Season liam ta khan Carrick hian Yoro hi match engemaw zat a zawnin a khelhtir a, a che ṭha hle a nih kha. Chuti chung a, tun season-a minute 10 vel chauhva a rawn luhtir ṭhin hian player naupang hi a ti phili mai mai a ni. Carrick hian Maguire-a sulhnu hlui thlir reng lovin, hmakhua thlirin Yoro hi a chhawr ngam zawk tur a ni a, United tan pawh hei hi a ṭha zawk ngei ang.