Manchester United leh Fulham ten 1-1 a inhnehtawkna an neih ṭum khan, United captain hlui leh pundit ni mek Gary Neville-a'n sawiselna na tak a lo nei a. Neville-a hian second half inṭan tirh minute 15 chhung kha "United chanchina ka la hmuh chhiat ber" tiin a sawi hial a ni. Neville-a chuan, "An tlawm thlak takzet a ni. Khatiang renga ṭhahnemngaihna nei lo kha ka la hmu ngai lo. Michael Carrick-a hian eng nge a ngaihtuah ang le?" tiin a sawi zui bawk.

Khami ṭuma United khelh dan kha a chhe hle tih chu phat rual a ni lo na a, mahse kum 51 mi Neville-a'n United a ṭan ṭan tirh kum 1980 aṭanga thlira "minute 15 chhe ber" tia a sawi erawh hi chu thil dik a ni chiah lo maithei. A chhan chu United chanchinah hian minute tlemte chhunga an tlawm chhiatna (collapse) thleng tawh a tam em em a, tun hnai kum tlemte chhung ringawt pawh thlir ila, entirna tam tak a awm a ni. Tun kar chhunga Carabao Cup-a Brighton-in United an sawp dan thleng khan sawisel tur a tam hle.

Premier League hun chhunga United tlawm chhiatna lian zual 10-te chu thlirlet ila:

1. Chelsea 4-3 Man Utd (April 2024):

United hian stoppage time thlengin 3-2 in hma an hruai a, mahse hun tawp dawnah an che sual ta thut a ni. Diogo Dalot-a'n penalty a chawi a, chu chu Cole Palmer-a'n minute 100-naah goal-ah a chantir a, hemi hnu second 82 lekah Palmer-a bawk hian goal dang khung lehin Chelsea-in hnehna an chang ta a. United hian point thum an hmuh tawh dawn emaw tih hnuah minute thum pawh tling lo chhungin an hnehna chu an hloh ta a ni.

2. Man Utd 1-6 Tottenham (October 2020):

Bruno Fernandes-a'n minute 2-naah goal khungin hma hruai mah se, minute 10 tlin hmain goal hnih an chhuah hman a. Minute 28-naah Anthony Martial-a'n red card hmuin hnawhchhuah a nih hnuah United hi an phili zui a, minute 10 chhungin goal hnih dang chhuah lehin, mualneitu United hi half-time a nih chuan mipui awm lohna Old Trafford-ah 4-1 ngawtin an hnufual hman a ni.

3. Man Utd 2-2 Sevilla (April 2023):

Europa League quarter-final first leg-ah United hian mahni mualah 2-0 in hma an hruai a. Mahse hun tawp dawn minute 10 chhungin an che chhe ta vek a ni. Tyrell Malacia-a'n own goal a thun a, Lisandro Martínez-a'n hliam na tak tuarin khelmual a chhuahsan a ngai a, player thlakna tur an hman zawh tawh avangin mi 10-in an khel zui a. Minute 92-naah Youssef En-Nesyri-a tauh chu Harry Maguire-a'n lo ti-lek sualin an lamah goal a lut leh a, minute 8 chhungin an hnehna tur chu an hloh ta vek a ni.

4. Leicester 5-3 Man Utd (September 2014):

Louis van Gaal-a hnuaiah United hian Premier League kaisang thar Leicester lakah 3-1 in hma an hruai a, mahse minute 62-naa David Nugent-a penalty aṭangin an che chhe ta vek a. Minute pahnih hnuah Esteban Cambiasso-a'n an siphurh a rawn sut a, Jamie Vardy-a'n 4-3 in hma a hruaipui a, Tyler Blackett-a'n red card a hmuh hnuah Leonardo Ulloa-a'n penalty aṭangin goal ngana a khung zui leh a. United hian minute 20 chhung lekin goal li ngawt an chhuah a ni.

5. Arsenal 3-0 Man Utd (October 2015):

Emirates Stadium-ah United hi minute 10 chhung lekin an sawp hman a. Alexis Sanchez-a'n minute 6-naah goal hmasa ber a khung a, a hnu lawk minute 7-naah Mesut Ozil-a'n a thun belh leh a. Minute 20 tlin hmain Sanchez-a bawk hian goal thumna a khung zui a, United tan kir leh ngaihna a awm tawh lo.

6. Southampton 6-3 Man Utd (October 1996):

Newcastle laka 5-0 a an tlawm hnu ni ruk lekah United hi an tlawm chhe leh hle a. Southampton-in 3-2 in hma an hruai a, Roy Keane-a'n red card a hmuh hnuah United hi an che chhe zui ta a ni. Minute 6 chhungin Eyal Berkovic leh Egil Ostenstad ten goal an khung a, Phil Neville-a'n an lamah a thun bawk a. Mahse, he season tawpah hian Sir Alex Ferguson-a naute hi an champion tho a ni.

7. Man City 6-3 Man Utd (October 2022):

Etihad Stadium-ah 1-0 a an hnufual laiin, half-time hmain minute 10 chhungin United hian goal thum ngawt an chhuah a. Erling Haaland-a'n goal hnih a khung hnuah Phil Foden-a'n a khung leh a, half-time a nih chuan 4-0 in an hnufual hman a ni.

8. Brentford 4-0 Man Utd (August 2022):

Erik ten Hag-a enkawlna hnuaia an match hmasa lamah, United hian minute 35 chhungin goal li ngawt an chhuah a. Minute 18 leh 35 inkar kha an che chhe zual hle a, David de Gea tihsual aṭangin Mathias Jensen-a'n goal a khung a, Ben Mee-a'n corner aṭangin a thun belh a, Bryan Mbeumo-a'n counter-attack hmangin goal lina a khung zui a ni.

9. Man Utd 4-4 Everton (April 2012):

United hian 4-2 in hma an hruai a, mahse minute 83-naah Rio Ferdinand leh Jonny Evans te tihsual aṭangin Nikica Jelavic-a'n goal a khung a, a hnu minute hnih lekah Steven Pienaar-a'n an siphurh a rawn sut leh a. He inhnehtawkna vang hian City-in goal difference-in United hi an khum zui ta a ni.

10. Liverpool 7-0 Man Utd (March 2023):

Anfield-ah half-time a nih chuan 1-0 chauhvin an hnufual a, mahse second half inṭan aṭanga minute 15 chhungin goal hnih an chhuah leh a. Inkhelh tawp lam minute 15 chhungin goal thum dang an chhuah belh leh a, kum 1931 hnua an tlawm chhiat ber ṭum a ni ta a ni.

Heng thilte kan thlir hian, Fulham laka United khelh dan kha chhia ni mah se, Gary Neville-a'n "ka la hmuh chhiat ber" a lo tih kha chu a lo dik ber lo tih a lang chiang hle a ni.