Manchester United chuan kumin nipui chhung khan player thar lakluh nan £191.7million lai an sen thu an nemnghet a, hei hi player pali an lakluh nana sum an thehchhuah zat £155m an lo tarlan tawh aia tam daih zawk a ni.
United hian nipui bazar chhung khan Karl Darlow chu a thlawnin (free transfer) an la a, Chelsea aṭangin Andrey Santos (£48m bakah add-ons £2m), Aston Villa aṭangin Youri Tielemans (£35m) leh Brighton aṭangin Carlos Baleba (£65m bakah add-ons £5m) te an la a, add-ons zawng zawng chhiar telin a vaiin £155m an hman thu an lo puang tawh a nih kha.
Mahse, Nilainia an kum tawp sum dinhmun (financial results) an tarchhuah hnu ni khat lekah, Ningani khan club exchange filings an tichhuak leh a. Hetah hian United hian nipui chhung khan player lakluh nan £191.7m ngawt an seng tih hmuhchhuah a ni a, a hmaa an lo puan tawh aiin £36.7m laiin a tam zawk a ni.
He sum inthlauhna £36.7m awm chhan hi agent-te hlawh (agent fees za zela 10 vel thleng), Premier League-in transfer aṭanga levy zaa 4 (4 per cent) an lak—PFA player pension scheme ṭanpuina atana hman ṭhin—bakah, he report an thehluh thlenga academy player thar an lakna man te a tel vang a ni tih hriat a ni.
Sum hman belh awm bakah hian, United chuan June 30 hnu lamah pound maktaduai 90 lai puk belh an neih thu an nemnghet bawk. United hian credit card ang deuhva duh huna pawisa lakchhuah theihna (rolling credit facility) an nei a, July 29, July 31 leh August 28 chhung khan vawi thum la chhuakin a vaiin £120m lai an la chhuak a, hemi hnu September 21 khan £30m an rul leh a ni.
Hei vang hian club leiba neih zat chu pound tluklehdingawn 1.15 (£1.15billion) laiah a kai chho ta a, stadium thar sak an tum mek laiin hetiang zata leiba tam hi thil ngaihtuahawm tak a tling a ni.
United hian stadium thar sak nan hian £2billion vel seng turin an lo chhut lawk tawh a, mahse kumin 2026-a an chhut thar lehnaah chuan a man hi a lêt hiala a to theih an ring a, leiba lian tham tak an neih tawh sa nen phei chuan thil huphurhawm tak a ni chho mek a ni.
He stadium sakna project hi mimal sum hmanga kalpui tur a ni a, sum peipungtu (investors) leh thawhpui theih turte nen pawh "inbiakna ṭha tak" an nei mek zel a ni. Stadium thar sakna tur sum hi a hming zawrhna (naming rights) hralhin an zawng dawn bawk a ni.
Kumin tir lam khan The Sponsor chuan European stadium hming zawrh theih dan hlutna (fair market value report) an chhut chhuakah, United hian season khatah £15m vel hmu thei tur anga chhutin, kum 10 chhungin £150m lai an la lut thei dawn tih an lo tarlang tawh bawk a ni.
