Tottenham Hotspur manager hlui Andre Villas-Boas chuan Gareth Bale lak tumin Manchester United-in theih tawp an lo chhuah dan leh, an beihnain awmzia a neih tak loh dan chungchang a sawichhuak ta.

Kum tam tak chhung khan United chief executive hlui Ed Woodward chuan he Welsh winger lakluh hi a atchilh hle ṭhin tih chu mi hriat lar a ni a. Bale hian kum 2013 nipui bazar lai khan khawvel record siamin £85m-in Real Madrid a zawm a, kar khatah £300,000 hlawhin kum ruk daih contract a ziak a nih kha. He transfer fee hian kum 2009-a Los Blancos-in Cristiano Ronaldo lak nan United hnena £80m an pek tawh chu a khum a ni.

Khatih hun laia an chang ta lo chung khan, Woodward hian he Welsh international lak theih beiseina hi a nei reng ṭhin a, mahse a taka puitlin a ni ngai ta lo a ni.

Bale-a'n Real Madrid a zawm aṭangin kum 13 a liam tawh a. Wales player hlui hian Bernabeu-ah nomawi a chawi kim hle a, Champions League nomawi vawi thum a chawipui hman a ni. Mahse, hliamin a tibuai zing em em a, a hun tawp lamah phei chuan football aiin golf khelh a ngaihtuah zawk anga lantir a nih avangin Madrid ṭantute mit a tlung ta meuh lo a, kum 2022-a a contract a zawh khan boruak ṭha lem lo tak karah club hi a chhuahsan a nih kha.

Real Madrid-in an ngaihven hma daih aṭang tawhin United hian Bale hi an lo thlithlai tawh a. Kum 2013 khan Sir Alex Ferguson pawhin Southampton aṭanga naupang te a nih laia lakluh hmasak ber an lo tum tawh thu leh, St. Mary's Stadium hotuten an thutiam an hlen loh avanga chang ta lo an nih thu a lo sawi tawh bawk. Hemi kum hian Ferguson-a thlaktu David Moyes pawhin Old Trafford-a lakluh a tum hle a, mahse Bale hian London chhuahsanin Madrid lam a pan ta zawk a ni.

'The Obi One Podcast'-a a inlan tumin Villas-Boas chuan United-in £120m ngawt thehchhuak mah se Bale hian a hnawlsak thu a sawi chhuak a:

"Gareth khan Real Madrid aṭangin offer a nei a. Man United-in minute hnuhnung bera an rawn phone kha ka la hria. Daniel Levy chu ka office-ah rawn lutin, an ni (United) chuan £120m lai thehchhuah an inhuam thu a rawn sawi a; mahse Gareth khan kal a duh lo. Real Madrid pan kha a duh ber a ni," tiin Villas-Boas chuan a sawi.

Manchester Evening News tarlan danin, United hian Bale-a career chhung zawng khan vawi li (4) ngawt lakluh an lo tum tawh a ni—Southampton aṭangin vawi khat, Tottenham aṭangin vawi khat, leh Madrid-a a awm laiin vawi hnih ngawt lak an lo tum tawh a ni.

Kumin tir lam khan Bale hi 'The Overlap' podcast-ah special guest niin a inlan a, a career chhunga United nena an sawizawm dan chungchang an zawh khan, 2013-a Real Madrid a zawm hma daih khan a thutlukna chu a siam fel tawh sa thu heti hian a sawi:

"Kum 2013 khan United nen chu kan inbe ngei mai. Real Madrid aia tam daih an thehchhuak bawk a ni. David Moyes nen pawh kan inbia. Mahse ka thinlung khan Madrid chauh a lo pan tawh a. Chu mai bakah Daniel Levy nen inremna (gentleman's agreement) kan lo nei sa tawh bawk.

"Tin, chiang takin Levy khan an elpui lian hnenah min hralh a, team dang tihchak kha a duh lo a ni. Levy hian thil a ti harsa hle na a, a tawpah erawh a thutiam ang ngeiin a ding nghet ta thung a ni," tiin Bale chuan a sawi bawk a ni.