Manchester United forward Marcus Rashford chuan January transfer window lo thleng turah Old Trafford a chhuahsan maithei a, Everton-in lakluh dan kawng an ngaihtuah mek nia sawi a ni.

Kum 28 mi forward hi manager hlui Ruben Amorim-a hnuaia a thawhpuite nena an intihthiam loh hnuah, Aston Villa leh Barcelona-ah loan-in a chhuak a, kumin nipui khan United-ah a kir leh a ni. Barcelona hian season liam ta khan La Liga nomawi an lakna kawngah goal 14 khung a, assist vawi 15 neitu Rashford hi £26m-a a ngheta lakluh theihna option nei mah se, an hmang ta lo a ni.

Old Trafford-a a kir leh hnu hian, Rashford hian inelna hrang hrangah match riat inlan tawhin goal leh assist a la nei miah lo a ni. A kawng (hip) hliam vanga a buai chhunzawm zel avangin, Premier League-a Bournemouth an hneh loh ṭum leh Champions League-a Como an hneh loh ṭum te khan head coach Michael Carrick-a squad-ah a tel thei lo a ni.

Como laka an tlawm hma khan Carrick chuan, "Marcus hian a kawng lam harsatna a la nei reng a, hei hi chinfel tumin kan thawk mek a ni," tiin a lo sawi tawh a ni.

Carrick-a'n Rashford hi a thlawp chhunzawm zel laiin, Everton chief executive hlui Keith Wyness chuan January thlaa Merseyside club-a Rashford-a insawn chungchang hi sawiho mek a nih thu a sawi chhuak thung. Football Insider hnena Wyness-a'n a sawi danin, "Hei hi strong tak maiin an sawiho mek a ni a, chinfelna awmze nei tak a ni thei ang.

"Villa leh Barcelona-a loan-a a awm lai khan Rashford hi a che ṭha hle a. Manchester nena an inhnaihna, M63 kawngpui zawh meuh a nih avangin ama tan pawh a ṭangkai hle ang.

"Jack Grealish pawh hetiang zawnga a insawn hi kan hmu tawh a, a fit laia a chet ṭhat zia kan hria. Rashford hi player lakluh phurawm tak a ni ang a, inbiakna a awm mek tih ka hria a, January-ah eng emaw a thleng a nih pawhin ka mak ti lo ang," tiin a sawi.

Kumin nipui bazar chhung khan Rashford hi Tottenham, Arsenal, Paris Saint-Germain leh Bayern Munich te bakah Turkey leh Saudi Arabia club-te nen pawh sawizawm a lo ni tawh a. Mahse, kar khata a hlawh £325,000 zet hi club danga a insawn nana harsatna lian tak a ni.

Nipui transfer window-ah target pawimawh tak tak an chan nual avanga beidawng Everton hian New Year-ah Rashford hi an dawr zui dawn em tih erawh hriat a la ni lo. Tun dinhmunah Toffees hian Premier League match riat an khelhah vawi hnih chiah hnehna an la chan avangin 11-na dinhmun an luah mek a, Carabao Cup quarter-final lut turin beiseina an la nei bawk a ni.