Benjamin Sesko-a'n hliam a tawh avangin, Manchester United chuan January transfer window inhawng turah centre-forward thar lakluh an rilruk mek a, Leeds United striker Dominic Calvert-Lewin chu an lakluh tum zinga mi a rawn ni chho nia report a ni.

September ni 16-a Carabao Cup-a Brighton an hmachhawn aṭang khan Sesko hi United tan a la inlan leh lo hrim hrim a, he match zawhah hian a ngal (shin) ah na a nei ṭan a ni. Carrington-a an club medical staff-te chuan he striker enkawl dan tur ṭha ber tihfel tumin inenkawlna an kalpui mek a, tunah chuan a tam berah January thla thleng a chawlh a ngaih hmel ta a ni.

Season liam ta pawh khan he ngal hliam avang hian an match hnuhnung pathum a lo hmaih tawh a, pre-season inbuatsaihna pawh inenkawl chhunzawm reng a ngaih avangin a hmaih vek bawk a ni.

United hian thla thum chhung zet chu striker pangngai chhawr tur nei lo dinhmun an hmachhawn dawn tak avangin, Sesko-a inenkawlna tur atan hian specialist-te rawnin ruahmanna an siam mek a ni.

Kar liam taa Como nena an inkhelh hmain United head coach Michael Carrick chuan Sesko-a hliam chungchang hi sawiin, "A nihna tak kan hriat fiah thuai ka beisei a ni. Engmah tihmuan ka tum lo a, kar tawp lamah chuan chiang zawkin kan hria ang a, thil pawh kalpui mek a ni," tiin a lo sawi tawh a ni.

Season liam taa Sesko-a'n ngal hliam a tawh khan, United chuan zai (surgery) aiin chawlhhahdam tir tawp zawk kha an lo thlang tawh a. Thla liam taa he hmuna na a neih leh hnu pawh khan zai chungchang hi sawiho a ni leh ta a ni.

Hetianga striker hmunruak a awm takah chuan, January ni 1-a transfer window inhawng turah United hian duhthlan tur an ngaihtuah ṭan ta a. The Athletic-in a tarlan danin, hun rei tak an lo thlithlai tawh Calvert-Lewin hi an player ngaihven berte zinga mi a ni.

United recruitment team-te chuan transfer window inhawng turah inremna siampui theih a nih leh nih loh an chhui chiang mek a, mahse he transfer hi a hlawhtling ang em tih erawh rin zawn a harsa rih hle. A chhan chu England international hi tun season-ah Leeds United tana player pawimawh em em a nih vang a ni.

Calvert-Lewin hian tun season Premier League-ah match riat a khelhah goal li a khung tawh a, Leeds pawhin contract thar ziahpui ngei an tum ruh hle. Kum 2025 nipui khan Everton aṭangin free transfer-in Elland Road hi a zawm a, kum 2028 thleng daih tur kum thum contract a ziahpui a ni.