Ruben Amorim-a enkawl mek AC Milan chuan nakkum nipui transfer bazarah an tlar hnung thuamṭhat nan Manchester United defender Leny Yoro chu lakluh an rilruk mek niin Calciomercato chuan a tarlang.
Yoro bakah hian Netherlands forward Joshua Zirkzee pawh San Siro lamah hruai luh an tum bawk a, heti a nih chuan United player pahnihte man atan hian pound maktaduai 72 (£72m) vel zet Milan hian thehchhuah an inhuam dawn tihna a ni.
Kum 20 mi Yoro hi July 2024 khan Lille aṭangin £52.2million-in United hian an la a. Manager Erik ten Hag-a hun lai ni mah se, pre-season laia a ke ruh a tihhliam palh avangin he Dutchman hnuaiah hian vawikhat mah a inlan hman lo a nih kha.
October 2024 khan United chuan Ten Hag hi an ban a, a thla lehkhaah Amorim chu a thlaktu atan an ruat zui ta a. Yoro hian December 2024-a Arsenal laka 2-0 a an tlawm ṭum khan United tana a match hmasaber khel nghalin, he mi ṭum hian Amorim-a naute zinga mi a ni.
Season chawhnu lamah beisei a phak loh avanga January 2026-a Amorim-a ban a nih hma khan, he Portuguese coach hnuaiah hian Yoro hi vawi 53 ngawt a inlan hman a ni. Amorim-a thlaktu Michael Carrick chuan Yoro hi centre-back leh right-back-ah a chhawr kawp ṭhin a. Pathianni liam taa Old Trafford-a Bournemouth laka 3-0 ngawta an tlawm ṭum pawh khan, Yoro-a tihsual palh aṭangin Bournemouth hian an goal hnihna an khung nghe nghe a ni.
Amorim hi kumin nipui khan Milan head coach thar atan nemnghet a ni a, an tlar hnung thuam chak a duh hle. Matteo Gabbia chu hun rei tak chawl tura a inhliam bakah Mario Gila pawh damlo enkawlna hmunah a awm ve leh tak avangin, Milan defence department chu Amorim-a rilru tibuaitu lian tak a ni chho mek a ni.
Serie A club hian thlasik transfer bazar inhawng turah hian defender lakluh an tum a, Bayern Munich centre-back Kim Min-jae leh Sporting CP defender Gonçalo Inacio te chu transfer bazar-a an lak luh tum ber zinga mi an ni.
Nakkum nipui lamah erawh Yoro hi an player lak duh ber zinga mi a ni thung a. Milan hian Yoro-a agent Jorge Mendes nena an inlaichinna ṭha tak chu he transfer tihpuitlin nan hian hman ṭangkai an beisei a ni. Milan hian £33.4m aṭanga £42m inkar vela he inremna hi tihfel an tum a, Yoro hian Old Trafford-ah kum 2029 thleng contract la nei mah se, United-in an ruahmanna pui (long-term plan)-ah an telh zui tawh lo a nih chuan hralh mai pawh an pawi ti lo thei bawk a ni.
Hei bakah hian Milan hian forward Joshua Zirkzee pawh an mit an len zui reng a. Dutch international man atan hian United hian £30million (€35m) an phut niin tarlan a ni a, Amorim pawhin a hma aṭanga a lo ngaihven tawh player a ni bawk.
Zirkzee hi season liam taa Carrick-a'n lailawka club a enkawl lai khan squad-ah hmun a chang mang meuh lo a, khelmualah minute 100 pawh a tling lo hial a ni. Mahse tun 2026/27 campaign tharah erawh Benjamin Sesko-a hliam vangin minute tam zawk a khel chho a, Netherlands national team-ah pawh Brian Brobbey-a hmunruak luahin koh a ni leh tawh bawk. Tun thla tir lam khan Serbia laka 2-1 a Netherlands chakna goal pawh Zirkzee hian a khung a ni.
Chuti chung chuan United hian kum 25 mi forward hi hralh an la inhuam reng a, a manah €35m (£30m) bawr vel dawn an remti a, a tirah loan hmanga chhuahtir pawh an hnawl chuang lo a ni.
