Manchester United manager hlui Ruben Amorim-a'n Marcus Rashford a hrem tirh khan, a naupan tette aṭanga a lo zawm tawh club Old Trafford-ah hian he English forward hian a hmabak a neih tawh loh hmel hle a. A tirah Aston Villa-ah loan-in a chhuak a, hemi hnu hian Spain lam panin, a ngheta lei theihna (buy option) telin Barcelona a zawm ta a ni.
Barcelona-ah hian a che ṭha hle a, La Liga nomawi an lakna kawngah goal 14 khungin assist vawi 15 ngawt a nei a ni. Mahse chuti chung chuan Catalan club hian he England international hi a ngheta lakluh zui loh an thlang ta thung.
United-ah a lo kir leh a, Carrington academy chhuak he player kum 28 mi hi head coach thar Michael Carrick chuan hun ṭha pe lehin, Old Trafford-ah a lo lawm lut leh a ni. Mahse Red Devils lama a rawn kir leh hi a tum angin a kal ṭha lo hle a, United No.9 shirt sartu Rashford hian tun season-ah goal khat mah a la khung lo a ni.
Hliamin a tlakbuak bakah a form a tlakhniam avangin inelna hrang hrangah hmun a chang tam thei lo a. Chuvang chuan United thuneitu INEOS te chuan January transfer window a inhawng a nih chuan, a fitness siamṭha a, inkhelh hun a hmuh tam zawk theih nan loan-a chhuah tir leh dan kawng an ngaihtuah mek a ni.
TEAMtalk report danin, Premier League club Everton chuan January thlaah Rashford hi loan-a lakluh an ngaihven hle a, a ngheta lei zui theihna (buy option) telh an duh a ni. Everton manager David Moyes chuan tlarhma thuam chak nan striker ṭha tak a mamawh hle a. Mahse, Toffees tan hian an duh ang ngeia he player lakluh hi thil awlsam a ni dawn lo a, a chhan ber chu Rashford-a hlawh a san em vang a ni.
Rashford hian kar khatah basic salary ringawt pawh £325,000 lai a hmu a. Tun dinhmunah Everton hi hralh tum (up for sale) mek an nih avangin, sum pek chhuah lian tak hetiang hlawh atan hian an nei hlei theih a rinawm loh a ni. Manchester United hian loan-a a chhuah chhungin a hlawh ṭhenkhat tum sak mah se, Everton tan chuan sum lama harsatna a la tling reng a ni.
Hei bakah hian thudawnna chuan Rashford pawhin Everton pan hi a duh lo maithei tih a tarlang tel a, a chhan chu Everton aia thiltum lian zawk (bigger ambitions) nei club-a khelh a duh zawk vang a ni. Old Trafford-ah hian Rashford hian a form ṭha rawn nei lehin United tana player pawimawh a rawn ni leh thei ang em tih chu thil thlirhawm tak a ni ang a, chuti a nih loh vek chuan Manchester United-a a hun hman chhunzawm zel tur hi a thim hle dawn a ni.
