UEFA Nations League campaign ṭanna inkhelah Portugal chuan 1-0 in Wales an hneh a, he match-ah hian Manchester United captain Bruno Fernandes chuan ram tana a match 95-na khelin chhinchhiah tlak thil thar a siam.
Portugal tana goal awmchhun hi hmahruaina goal niin, first half-ah Joao Felix chuan a khung a ni. Second half ṭan tirah Manchester United star hlui Cristiano Ronaldo chuan an goal hnihna a khung ve bawk mah se, VAR hmanga enfiah a nih hnuah offside avangin pawm a ni lo thung. Portugal mipuite tan erawh Wales an hneh dan hi duhaiin an sawp tawk lo deuh va, goal tam zawk khung thei turah an ngai a ni.
Wales laka he match-ah hian Fernandes hian goal a khung lova, assist a nei lo bawk. Mahse, khelmual chhunga player inlan zawng zawng zingah chance siam hnem ber niin vawi 5 ngawt chance a siam a, hei hi Manchester United-a a khel thlir ṭhinte tan chuan thil mak a ni lo.
Bruno Fernandes-a tan he match hi hriatreng tlak tak a ni a, Portugal tana a match 95-na (international cap) a khelhna a ni. Hei hian Portugal legend Rui Costa-a record (match 94) khumin, Portugal tana match khel hnem ber mi 10 (top 10) zingah a inhlangkai ta a ni. Bruno Alves-a record (match 96) phak nan match khat chiah a mamawh tawh a, a hmaah hian Rui Patricio (match 108), Fernando Couto (110) leh Nani (112) te an la awm bawk. He list-a hmahruaitu ber chu match 234 inlan tawh Cristiano Ronaldo a ni a, ani hian a ram tan kum khat tal chu a la khelh chhunzawm zel tur thu a lo tiam tawh bawk a ni.
Portugal manager Jorge Jesus-a hnuaiah Fernandes hi midfield veilamah a inlan a, he position hi United-a manager hlui Ruben Amorim-a hnuaia a lo khelh tawhna ṭhin a nih avangin a mikhual lo hle. Tun dinhmunah Manchester United-ah Michael Carrick-a hnuaiah hmun sang zawka a khelh laiin, ram team-ah erawh mual laili aṭanga thunun theihna hmun hniam zawk (deeper role) a luah a ni.
Match zawhah Fernandes chuan team khelh danah a lungawi thu sawiin, Maisfutebol hnenah: "Ka pawm ve tlat lo. Chance tam tak kan siam a, khingpuite court-ah kan awm chawt a, ball chan hnem zawk niin match kan thunun hneh hle a ni. Score zat pawh nise, siamṭhat tur erawh a awm reng ṭhin. Mahse team-in ni thum chauh inbuatsaihna hun kan neih hnuah coach ruahmanna kan zawm ṭha hle a, inkhelh ṭha tak a ni tlat a ni," tiin a sawi.
Khelmuala a awmna position chungchang sawi chhunzawmin Fernandes chuan: "Inkhelh hi ngun takin i lo en a nih chuan, mual lailiah ka awm tlangpui a, tlarhnung venhim ngaihna hmun a nih loh chuan sir lamah ka chhuak khat hle. Kan nawr sang bawk a, chuvang chuan mual hma lamah ka awm ngai reng a ni. Hmun awlah awmin striker leh second striker-te nen ṭangduna goal siam chhuah hi ka hna a ni a, a hlawhtling viauin ka hria. Hun a kal zel ang a, kan la ṭha chho zel ang," tiin a sawi.
