Manchester United star hlui Nani chuan he club tana a la khelh ngei tur thu a tir aṭang tawhin a lo hriat lawk tlat ṭhin thu a sawichhuak.

Nani hi kum 2005 khan Sporting CP-ah a rawn inhlangkai a, kum 2007 thleng khan he club-ah hian a awm a. Match 76 khelhah goal 11 a khung hman a ni. Kum 2007 nipui khan Manchester United a zawm a, a season hmasa berah Premier League leh Champions League nomawi chawiin a suangtuahna a puitling nghal a ni. Red Devils tan hian inelna hrang hrangah match 240 inlanin goal 40 a khung a. United-a a awm chhung hian league title vawi li, League Cup vawi hnih, Community Shield vawi li, Club World Cup pakhat leh Champions League nomawi pakhat a chawi hman a ni.

Nani hian a ram Portugal tan pawh match 112 inlanin goal 24 a khung a, France rama khelh Euro 2016-ah khan an ram hi a champion pui hial a ni.

Club media-te a biaknaah, Nani-a'n Red Devils tana a la khelh ngei tur thu a lo hriat lawk dan chanchin hi a sawichhuak a. A khelhpui hlui Wes Brown-a hnenah kum 1999-a Barcelona khawpuia Bayern Munich laka United-in hun tawp lama goal hnih khung chunga Champions League nomawi an chawi ṭum khan khawiah nge a awm tih a hrilh a ni.

He Portugal international hlui hian May 1999-a khaw thim leh ruah sur hnuaiah, kum 12 mi lek a nih laiin an ram Portugal-a Spain ramri hnaiha khaw pakhatah a awm thu a sawi.

Nani-a'n, "Kei leh ka ṭhianpa kha coffee dawrah kan lut chiah a. Chutih lai tak chuan inkhel kha a lo kal mek a ni. Inkhelh zawh nan minute hnih vel chiah a bak tawh a, chutah goal hnuhnung pahnih, inkhel thlak danglama hnehna kan chan takna goal-te kha kan va hmu ta a ni," tiin a sawi.

Nani-a'n sawi chhunzawmin, "Khami ni khan ka ṭhianpa hnenah khan: 'Ni khat chu he team-ah hian ka la khel ngei ang. Hei hi ka team tur a ni,' tiin ka hrilh a ni," a ti bawk.

He winger hian kum 2008-a Moscow khawpuia Chelsea nen penalty shootout-a an inhmachhawn ṭum khan United chakna tura penalty pawimawh tak a lo pet goal ngei bawk a ni.