Manchester United manager Michael Carrick chuan tun season-a an first-team player-te khelmualah an tlan tawk lo tia sawiselna nasa tak a tawk mek a ni. Bruno Fernandes-a'n an tactics a sawiselna chu kum 45 mi Carrick hian lo hnawl bawk mah se, Red Devils-te hi khingpuite laka an ṭang tawk lo hle tih sawiselna a tam hle a, a bikin Fulham, Brighton leh Como nena an inkhelh ṭum te khan tlan thahnemngai lo tiin sawisel an hlawh a ni.

FotMob-in 2025-26 leh 2026-27 season-a United player-te tlan chak zawng (sprint speed) data an chhinchhiah aṭangin, Patrick Dorgu-a awm loh hlei hlei hi Carrick-a tan chuan harsatna lian tak a tling a ni. Season liam ta khan kum 22 mi Denmark left-back Dorgu hi Amad Diallo leh Diogo Dalot te nen tlan chak ber thleng pha niin, darkar khatah 34.7 km/h zeta chak in an lo tlan tawh a ni. Mahse, mual veilam sir leh winger hmun danga khel thei Dorgu hi tun season inelnaah chuan an chhawr hlei theih loh a ni.

October thlaa ram tana a khelh ṭuma a malpui tihtaulh (hamstring injury) avangin Dorgu hi Premier League match-ah a inlan thei rih lo a. Fulham, Brighton leh Como nena an inkhelh ṭum te khan match khatah chauh Carrick-a nauten he Danish international hi an chhawr thei a ni. September thlaa Craven Cottage-a Fulham 1-1 a an inhnehtawk ṭum khan bench aṭanga rawn lutin minute 6 chauh a khel a, mahse Matheus Cunha-a goal khung tur a siamsak (assist) nghal ta mai a ni.

Tun season chhungin inelna hrang hrangah Dorgu hi vawi 6 chauh a inlan a, Premier League match 5 aṭangin vawi hnih chauh a bul a ṭan hman a ni. Red Devils supporter-te pawhin Reddit leh platform hrang hrangah sawihona neiin, team chak tak tak te an hmachhawn ṭumin Luke Shaw aia Dorgu hi left-back-ah hman tur nge maw ni tiin an inhnial hial a ni. Kum 31 mi England left-back Shaw hi season liam ta leh tun season chhunga tlan chak berte zingah tel mah se, a hliam neih ngun avangin rintlak taka chhawr puitling a harsa ṭhin a ni.

Carrick-a ruahmanna hman mekah Dorgu-a rawn thlen ṭhin chakna leh ṭan lakna (intensity) hi United tlarhnung leh tlarhma tan a pawimawh em em a. United boss hian attack lam atana chhawr ber ṭhin mah se, he Danish talent-a tlan chakna hi tun season-a mual veilama an buaina chhanna ber a ni thei tlat a ni.