Manchester United striker Benjamin Sesko chu a ngalah (shin) hliam a neih mek chu a zualkai tak zel avangin, a tlem berah nakkum January thla thleng chu khelmualah a inlan thei dawn lo tih chanchin thar duhawm lo tak a rawn chhuak ta.

Slovenian striker Sesko hi September thla hnu khan United tan a la inlan leh miah lo a, training-ah pawh hmuh tur a awm tawh lo hrim hrim a ni. A match hnuhnung ber chu Carabao Cup-a Brighton laka 3-2 a an tlawm ṭum kha a ni a, hemi hnu aṭang hian khelmual a hlat zui ta char char a ni.

Pre-season chhung zawng hliam vangin inlan thei lo mah se, Sesko hian tun season bul chu a rawn ṭan ṭha hle a, match hmasahoah goal hnih ngawt a rawn khung hman a nih kha. Mahse, a hliam hmasa aṭanga harsatna dang a neih chhunzawm leh tak avangin khelmualah a inlan thei ta lo a ni. Tunah hian club medical staff-te thurawn angin, a hliam hi dam fel tak taka a inenkawl theih nan thla hnih dang zet chu hahchawlh phawt tura tih a ni.

Sesko-a chawlh rei a ngai tur hian Manchester United tan nghawng lian tak a nei a. A hmunruak luah tur hian an khelhna pangngai ni loah Bryan Mbeumo leh Matheus Cunha te chu chhawr an ngai a, chutih rualin Sesko-a awm loh hlan pawh hian Dutch forward Joshua Zirkzee chuan starting eleven-ah hmun nghet a chang thei chuang der lo thung a ni.

Sesko a chawlh aṭang hian United form hi a chhe em em mai a, a inlan loh hnu hian inelna hrang hrangah match khat mah an la chak lo a ni. Tlarhmaa finisher ṭha an mamawh zia leh a awm loh vanga goal thun theihna kawnga an buai dan chu an khelh tawh azawngah a lang chiang hle.

He chanchin duhawm lo tak hian Ineos leh club thil lakluhna lama mawhphurtute (recruiting team) chungah sawiselna leh nawrna nasa tak a rawn thlen zui nghal bawk. Sesko hian pre-season match zawng zawng a khelh theih loh lai pawh khan, transfer window inhawng chhungin striker lakluh tumna an lo nei lo a, striker thar lak luh lova season an ṭan chu tunah hian a pawi ta hle a ni.