Manchester United manager Michael Carrick-a hmabak chungchangah sawi a tam hle a, tun kar chhung khan chhuak mai tur anga sawi a nih hnuah Ineos lam chuan an la thlawp rih niin a lang a. Thawhlehni khan Carrington-ah training a kaihruai a, Inrinni hian Stamford Bridge-ah Chelsea an hmachhawn dawn a ni. Mahse, he Red Devils legend hian Blues lakah fiahna lian tak a hmachhawn mek bawk.

Carrick-a ban a nih hlauh chuan Italian coach Antonio Conte chu Old Trafford zawm tura ngaihven hlawh berte zinga mi a ni. Kum 57 mi, Napoli leh Juventus manager hlui hi tun dinhmunah club nei lo (free agent) a ni mek a. United nen inbiakna thui tak an neih tawh nia sawi chu Conte hian social media lamah a lo hnawl tawh a ni. Conte bakah hian Newcastle boss hlui Eddie Howe, Aston Villa manager Unai Emery leh Germany head coach hlui Julian Nagelsmann te pawh sawizawm an ni bawk.

Gary Lineker chuan Conte-a'n Old Trafford a pan theih lohna tur kawnga dalna lian ber chu, club enkawlnaa thuneihna sang zawk pek a duh loh vanga Sir Jim Ratcliffe-a dinhmun a nih theih thu a tarlang. Conte hian team din thar kawngah thuneihna thuk zawk neih a duh dawn a, a khelh dan phung nena inmil tur player lakluh kawngah thu neih a phut ngei a rinawm a ni.

'The Rest Is Football' podcast-ah Lineker chuan, "He thilah hian ka sawi theih pakhat chu, Ratcliffe ang mi hian tu emaw hnena club pum inrelbawlna thunun theihna pek an duh ka ring lo a ni. Chutah chiah chuan keima tan chuan harsatna a awm ta a ni," tiin a sawi.

Lineker chuan Ineos hnuaia United inrelbawlna hi an hotu lu lam aṭanga an siksawi phawt loh chuan, khawvela coach ṭha ber berte tan pawh United chu pan châkawm a nih loh thu a sawi zui bawk.

"An chunga mite an insiamrem hma chu, tun dinhmunah coach ropui ber berte tan thil duhawm tak a nih ka ring lo. Coach eng emaw zat hna nei lo an awm a, Conte kan ti a nih pawhin: coach ropui tak, sang tak, ram hrang hrangah league title lo la tawh a ni.

"Mahse a khelh dan phung hi a pragmatic em em a, tlarhnung venhim ngai pawimawh chi a ni a, chu chu Manchester United mizia nena inrem lo a ni maithei. Manager thlak apianga khelh dan style an thlak zel bawk si chuan hun rei daih tur ruahmanna a awm thei lo a ni. Eng emaw laiah chuan, 'Engkim hi kan thlak danglam a ngai a ni. Player lakluh kawngah ngun taka kan ngaihtuah a ngai a, hun rei tak daih tur mi kan lakluh a ngai,' an tih a ngai dawn a ni.

"Coach thar an lak apiangin, 'He mi hi a ni tawh ang a, hun rei tak a daih tawh ang' an ti ngei ang. Mahse an inrelbawlna danga thil dik lo an siamṭhat phawt loh chuan chutiang chu a thleng thei dawn lo a ni," tiin Lineker chuan a sawi belh bawk.

Conte hi 2025-26 campaign tawpah khan Napoli chhuahsanhnuin tun thleng hian club dang a la enkawl leh lo a. Italy manager hlui hian Stadio Diego Armando Maradona lamah Serie A title a lo lakpui tawh a, Premier League-ah pawh Chelsea leh Tottenham Hotspur te a lo enkawl tawh bawk a ni.

Tun dinhmunah chuan Chelsea hmachhawn tur hian Bruno Fernandes leh Carrick te chu inbiain boruak an siamṭha tawh niin tarlan a ni a, Fernandes hi Stamford Bridge-ah bul ṭan tura beisei a ni bawk.