Manchester United tlarhma (striking department) dinhmun hi chinfel vat ngai, an squad-a buaina lian berte zinga mi a ni chho mek a ni.

Benjamin Šeško hian theihna sang tak leh beiseina sang tak nei mah se, a vanduaithlak zawngin a hriselna a vawng ṭha hleithei lo a, hliamin a tibuai ngun hle. Season liam ta tawp lamah khan a chawn ruh hliam (shin injury) avangin Premier League match hnuhnung pathum a khel thei lo a, hemi hnu hian nipui pre-season inbuatsaihna zawng zawng a hmaih zui vek bawk a ni. Tun season thar Premier League-ah game nga khelh a ni tawh chung pawhin he striker hian first XI-ah bul a la ṭan thei miah lo a ni.

Fulham nena 1-1 a an inhnehtawk ṭum pawh khan Šeško hi a inlan thei lo a, report te tarlan danin a chawn ruh hliam bawk chu a thar thawh leh nia hriat a ni a. Eng chen chiah nge a chawlh a ngaih dawn tih nemngheh la ni lo mah se, hun eng emaw chen chu khelmual a chhuahsan leh a ngai maithei a ni.

Šeško a inkhelh theih loh takah hian United tlarhma lailiah striker dik tak (out-and-out striker) mamawhna a lang chiang hle. Joshua Zirkzee hi striker tak tak aia No. 10 position-a khelh nuam ti zawk a ni a, team tana ball pe kual leh hmun siam lamah a che ṭha zawk a ni. Matheus Cunha pawh veilam sir aṭanga lut tlang tura khelh nuam ti chi a ni a, tlarhma laili bera khingpuite tlarhnung hmachhawn tur erawhin taksa tharum leh hlauhawmna a nei tawk lo a ni.

Hemi avang hian United hian Sunderland striker Brian Brobbey anga player tharum ngah, Premier League defender lian leh khauh tak takte pawh nawr buai ngam player an mamawh takzet nia ngaih a ni a. Tlarhma lailia khingpui tlarhnung tibuai thei leh tharum hmanga nawr thei striker an neih loh chuan, United hian an match khelh mekah goal khung kawngah harsatna an tawk chhunzawm zel maithei a ni.