Manchester United manager hna chelh mektu Michael Carrick-a hmakhua a chian loh tak zel avangin Old Trafford-a a thlaktu tur zawngin sawizawm an tam hle a. Heng zinga mi langsar ber ber pahnih chu Newcastle United manager hlui Eddie Howe leh Bayern Munich boss hlui Julian Nagelsmann te an ni. Everton chief executive hlui Keith Wyness chuan heng coach pahnihte hian Old Trafford-ah ruahmanna danglam tak ve ve an rawn thlen a rin thu a sawi.

Football Insider hnena a hrilh danin, Wyness-a'n United-in buaina an neih tak tak zawn chhuah a pawimawh hmasak ber thu a sawi a. Wyness-a chuan, "He thil hi thil pawimawh tak a ni. An buaina hi tu vanga lo chhuak nge tih aia an buaina tak tak zawk hi an hmuh chhuah hmasak a ngai a ni. Eddie Howe-a'n a hmachhawn a nih chuan Newcastle-a a lo tih tawh ang bawk khan club boruak leh rilru put hmang (culture) siamṭhat a tum ber ang a, Nagelsmann erawh chuan an khelh dan phung leh khelmual chhunga ruahmanna (concept leh style) siksawi a ngaihpawimawh zawk a rinawm," tiin a sawi.

Wyness-a chuan sawi zawmin, "An buaina tak tak hmu chhuaka, chu buaina chinfelsak thei tur manager ruat hi hun laia milar leh mi hmingthang satliah ruat ringawt aiin a pawimawh zawk a ni. Hemi kawnga an lo ti sual tawh ṭhin hi tun thlenga buaina an tawh phah chhan ber a ni," tiin a sawi bawk.

Stamford Bridge-ah khualmualah Chelsea 2-0 a an hneh loh hnuah United hi tun dinhmunah Premier League-ah 17-na dinhmun ah an awm mek a. Red Devils te hian inelna hrang hrangah match pakuah (9) hnehna an chang tawh lo va, an match nga khelh hnuhnung bera match li (4)-ah an tlawm tawh a ni.

Carrick-a naute hian Thawhlehniah Champions League inelnaah Roma an hmachhawn ang a, hemi hnu hian mahni mual Old Trafford-ah Aston Villa an mikhual leh ang. The Athletic-in a tarlan danin, United hotute hian kar thar tawp lama international break a thlen hunah Carrick-a hmakhua tur chungchangah thutlukna an siam ang.

Stamford Bridge-a an tlawm hnuah Carrick chuan a rilru a nat thu leh beidawn a tum loh thu a sawi a. TNT Sports hnenah Carrick-a'n, "Rilru a no duh hle a ni. Club ropui tak kan ni a, mahse football match-ah hnehna chan kan duh a ni. Kan support-tu fan-te hian sum tam tak sengin min ṭan turin thui tak an rawn zin a. Vawiin (Inrinni) ah pawh khan ka naute hian thil kalphung dik takin game an khel a, mahse thil engkim a kal sual pui tak avangin thil a chhe ta em em a ni. Tunah rih chuan rilru a kal ding hle a ni," tiin a sawi.