Kum 2024-a Manchester United-a minority stake a neih aṭanga Sir Jim Ratcliffe-a club enkawl danah club neitu Glazer chhungkua chu an lungawi lo chho tial tial nia report a ni. Ratcliffe hian £1.2billion vel sengin United-ah share zaa 25 a lei a, a hnuaia INEOS group chuan football lam inrelbawlna zawng zawng an kuta dahin mawhphurhna an la a nih kha.
Mahse, Glazer chhungkua hian club hralh theihna thuneihna chu an la chelh reng a. He inremna hnuaiah hian Ratcliffe chuan Old Trafford hmasawnna tura infrastructure siam nan £245million dang thehchhuah a tiam bawk a, a sum thehchhuah zawng zawng chu £1.5billion vel a tling a ni. Mahse, hetiang sum tam tak thehchhuah a nih hnu pawhin khelmual chhungah hmasawnna hmuh tur a awm meuh lo. Hla tak aṭanga Old Trafford boruak thlithlaitu Glazer chhungkua chu Ratcliffe-a hruaina hnuaia club kalphungah hian an beidawng hle nia tarlan a ni.
Glazer chhungkua hnaihtu pakhat chuan Mail hnenah, "Thil tenawm (travesty) tak a ni a, an beisei leh an lo intiam ang kha a ni lo tawp mai," tiin a sawi a, "Club hi hetiang hian an la enkawl ngai lo hrim hrim," a ti bawk. Chu mai bakah, thudawnna dang pakhat chuan tun kar khan ESPN hnenah sawiin, Glazer-te chuan Ratcliffe hian "dinhmun chhe zawk a siam chhuak thei tawh kher lovang" tih an ngaihdan a nih thu a sawi a. He thudawnna chuan Old Trafford-a "department tin an hlutna tihhniam" chu a thil tum leh ruahmanna a lo sawi ṭhin nena inpersan chiah a nih thu a sawi bawk a ni.
Khelmual chhungah United hian harsatna an la tawk tluang zel a, inelna hrang hrangah match riat chhung zet hnehna chang zo lovin an awm mek a ni. Tun season Premier League-ah vawikhat chiah hnehna an la chang a, hei hi kum 40 dawn chhunga season bul an ṭan chhiat ber ṭum a ni hial. Inrinni hian Chelsea an hmachhawn dawn a, table mawngphah aṭanga point hnih chauha sangah awmin, football lam enkawltute lakah pressure a sang zual hle.
United dinhmun chhiat chhoh zel hian club hlut zawng pawh a tihniam viau tura ngaih a ni. Kum li liam taa hralh an tum khan Glazer chhungkua hian club manah hian $6billion (£4.5billion) an chhiar a, mahse tun dinhmunah chuan chu zat chu chhiar ngam chi a ni tawh meuh lo. Chuti chung chuan American chhungkua hian nakina club hralh a nih dawn pawha thuneihna sang ber an la chelh reng a. 2024-a Ratcliffe nena an inremna dan ang chuan, club hi mi dang hnena hralh Glazer-ten an remti a nih chuan, a hnu leha zaa 28 thlenga pung ta Ratcliffe-a share pawh hi hralh vek turin an nawr thei a ni. Ratcliffe hian club pumpui leina tur sum a thehchhuak a nih ngawt loh chuan chu hralhna chu a dang thei dawn lo a, chu chu thil theih a nih a rinawm loh hle.
Glazer-te hian Ratcliffe-a share hi an lei let ngawt thei lo a, mahse nakkum February thla aṭang chuan a tira share khata a man $33 (£25) a pek aia tlawmin Glazer-ten club an hralh duh a nih pawhin he INEOS hotupa hian a dang thei tawh dawn lo a ni. Hemi rual hian INEOS chuan hmun dangah football lama an sum chevel an tihniam ṭan mek a, Swiss club Lausanne-Sport chu hralh tura chhawp chhuah a ni tawh a, French club Nice an hralhna man pawh an tihniam tawh bawk a ni.
