Carabao Cup aṭanga an tlak hnuah Manchester United dinhmun a ṭha lo zual zel a, an striker Benjamin Sesko-a'n kerek hliam a tawrh nawn leh tak avangin Slovenia squad aṭanga a inhnuhdawh a ngai ta bawk.

Kum 23 mi striker hian Fulham nena 1-1 a an inhnehtawk ṭum khan a khel thei lo tawh a, tun hnaia Slovenia-in Nations League-a Scotland (vawi hnih), North Macedonia leh Switzerland an hmachhawn turah pawh a inlan thei dawn ta lo a ni.

Sesko chauh hi ram tana inlan thei lo United player a ni lo; England international pahnih Marcus Rashford leh Kobbie Mainoo te pawh ram tan inlan lovin, chawlhkar thum chhung Carrington-ah Tottenham hmachhawn turin an inpuahchah dawn a ni. Wales goalkeeper Karl Darlow pawh ram squad aṭangin a inhnukdawk bawk.

Season liam ta tawp lama hliam vanga lo chawl tawh Sesko tan hian 2026-27 season bul ṭan dan chu a fuh lo hle a. Brighton laka 3-2 a an tlawm ṭum khan tun season-ah a vawikhat nan a bul a ṭan a, mahse Craven Cottage-a Fulham an tlawh ṭum khan a kerek hliam hlui a rawn chhuah leh tak avangin a inlan thei ta lo a ni. Nipui transfer bazar-ah khan Ineos lamin Slovenia striker thachhang dawltu tur striker thar an lakluh theih tak loh avangin, head coach Michael Carrick-a squad-ah hian centre-forward pangngai hriat lar awmchhun a ni a, a chawlh hian United leh Slovenia national team tan nghawng lian tak a nei a ni.

Thawhṭanni khan Manchester United chuan thuchhuah siamin, "Benjamin Sesko chuan chawlhkar thum chhung ram tana chawlh (international break) a awm turah Slovenia squad aṭanga a inhnuhdawh thu United chuan an nemnghet e. Benjamin hian enkawl zui a nih dan tur ruahman fel hmain endikna (test) a paltlang ang," tiin an puangzar a ni.

Hemi hnu hian Sesko chuan Instagram story hmangin Slovenian national team leh fan-te hnenah ngaihdam a dil a.

Sesko chuan, "National team match lo awm turte ka khel thei dawn lo hi pawi ka ti takzet a ni. Slovenia tan hian thinlung zawng zawng leh induhtawkna neiin ka khel ziah ṭhin a, ka khel chhunzawm zel bawk ang.

"Tunah chuan ka dam chhuah leh theih nana ka theihna zawng zawng pek a pawimawh ber a ni. Khelmuala rawn kir leh thuai a, kan ram team leh club te ṭanpui leh vat turin theih tawp ka chhuah mek a ni.

"Kan mipa te theihna hi ka ring tawk a, kan lo neih ṭhin team spirit ṭha tak kha an lantir leh ngei ang tih ka ring tlat a ni. Ram aiawh kawr ha chunga khelmuala luh leh vat ka nghakhlel hle a, chumi thleng erawh Slovenia ṭantu ber ka ni ang," tiin a sawi.

United chuan Sesko hi dam chhuak vat turin an beisei a. Carrington lamah chawlhkar thum chhung inenkawlna a kalpui dawn a, Tottenham an hmachhawn hunah chuan a dam hman ngei an beisei a ni.