Tun season chhung hian Manchester United tan beiseina thar thlentu chu Kobbie Mainoo a ni chiang hle. Season liam ta nena tehkhin chuan, kum 21 mi Mainoo hi a khelhna hmun hrang hrangah a hma aiin a puitling tawh zawk a, Youri Tielemans nen tlar lailiah inkawp fuh tak an ni mek a ni.
Head coach Michael Carrick chuan Mainoo-a hmasawnna chu a fak hle a, hei hian Ruben Amorim-a'n he rawlthar laka thutlukna a lo siam sual zia leh chhuak tura a lo nawr luih ṭhin zia a tarlang chiang hle. Carrick-a kaihhruaina hnuaiah hian Mainoo-a ball pass dan pawh a hma aiin a ṭha tawh zawk a ni. Mahse, ball a neih loh laia a chet velna (without the ball) hian a ni tun season-ah chuan league-a hmahruaitu a nih tir tak ni, hei hian Amorim-a lo ngaihdan kha a dik loh zia a tarlang nawn leh a ni.
Amorim-a'n Mainoo-a laka harsatna a lo neih ṭhin chu, tlar lailia Bruno Fernandes-a thlawp tur khawpa taksa chakna leh tlarhnung venhimna lama hriatna (defensive awareness) a neih tlem vang a ni a. He thil hi a hma chuan Mainoo-a buaina ni ṭhin mah se, thla kua liam ta chhung khan a theihna sang ber pakhatah a chantir thei ta tlat a ni. Chu chu ball chhuhsak (possession won) theihna hi a ni a, tun season Premier League-ah chuan ball chhuhsak hnem ber a ni mek a ni.
Goalkeeper-te tih lohah chuan, Mainoo hian Premier League-ah vawi 39 ngawt ball a chhuhsak leh tawh a, he tlarah hian hmahruaitu a ni mek. He a record hian Senne Lammens-a record pawh a khum a ni. Mainoo-a dawtah hian Lewis Hall chu vawi 37-in a dawt a, Alex Scott chuan vawi 35-in a dawt bawk. Hei hian Mainoo-a'n a khelh dan phung a thlak danglam hneh zia a tilang a, tlar lailia hna bawlhhlawh (dirty work) thawktu berah a ṭang a, counter-attack lakah pawh a tlan kir rang thei hle a ni. Hei hian Fernandes-a bula khel tura Amorim-a'n a lo rinhlelhna lian ber chu a chhang chiang hle a ni. A nihna takah chuan, Casemiro-a hmunah khan Mainoo hi lo chhawr zawk nise chuan Amorim-a khan hlawhtlinna a hmu hnem zawk ngei ang.
Mainoo-a kawppui tur ṭha ber chu Carlos Baleba a ni a, Baleba a lo luh chuan Mainoo-a mawhphurhna pawh a danglam hlawk dawn a ni. Tlan kual leh hna hahthlak thawh ngai tawh lovin, Tielemans-a'n tun season-a a tih ang khan hma lam nawr (progressive play) kawngah a che thei tawh zawk ang. Thui tak thlirin, Mainoo hi defensive midfielder (number six) anga chhawr reng chi a ni lova, tun season-a a chet ṭhatna hi thil ṭha tawp erawh a ni lo, a chhan chu a khelhna hmun tur dik loah chhawr a nih vang a ni.
United tan tun season-ah Mainoo hi eng anga eng ber ni mah se, a theihna tak tak pholang thei lo tur hmunah chhawr a ni tlat a. Tlarhnung venhimna lamah hmasawnna pholang mah se, Carrick-a'n ball chhuhsak hna chauh a thawhtir hi a theihna hmehhlumna a ni ve tho bawk. Mainoo hi penalty box chhung velah te, hmun chepah te ball pe a, game thlak danglam thei tura chhawr tur a ni zawk a, United tlarhnung chhe tak venhim nan chauhva hman hi a uiawm hle. Baleba a lo luh chuan he harsatna hi a chingfel thei dawn a, tlar lailia tlan kual thei a nih avangin Mainoo hi thlamuang takin hma lamah a nawr chho thei tawh dawn a ni.
