Tun kar hian UEFA Nations League khelh ṭan a ni a, kar thum chhung zet ram tana chawlh (international break) neih chhung hian Manchester United player eng emaw zat chu an ram aiawhin an fehchhuak mek a ni. Ningani zan khan Lisbon-ah Portugal-in Wales an hneh ṭum khan Bruno Fernandes chu a lo inlan tawh a.

Zaniat lam khan United player dangte pawh an inlan ve leh a, Youri Tielemans-a'n captain-na hrui hrengin Belgium chu Roberto Mancini-a enkawl Italy lakah 2-0 in hnehna a chanpui a, goalkeeper Senne Lammens-a'n goal chhuah loin clean sheet a nei bawk a ni.

Khualmualah khel mah se, Belgium hian first half-ah Italy tlarhnung chet sualna chu remchangah lain hma an hruai hmasa a. Minute 20-naah Mika Godts-a'n goal hmasa ber a khung a ni. Second half-ah Italy lam hi rawn che ṭha deuh mah se, Belgium tlarhnung an thiat thei lo a, inkhel tawp dawn minute 20 vel a la awm tihin Belgium hian goal dang an thun belh leh a. Dodi Lukebakio-a goal khung hmangin Belgium hian 2-0 in hnehna an chang ta a ni. He match-ah hian Tielemans-a'n tlar laili lamah inkhelh chhung zawng a khel tluan thak a ni.

Godts leh Lukebakio te goal hmanga Italy laka 2-0 a an chak hnu hian Belgium camp-ah hlim hmel hmuh tur a tam hle. He match-ah hian Tielemans-a'n tlar lailiah Kevin de Bruyne leh Nicolas Raskin te nen bul an ṭan a. Kum 29 mi midfielder hi Belgium starting line-up-a United player awmchhun a ni lo a, Thibaut Courtois-a awm loh hlanin goalkeeper Lammens-a'n bul a ṭan ve bawk a ni.

Khelmualah United player pahnihte hi an che ṭha dun hle a, Tielemans-a'n tlar laili thununin second half-a Italy-in nawr nat an tumna lakah a lo dang chat ṭhin. Inkhelh chhungin ball vawi 45 a khawih a, pass vawi 32 a neih zinga 26 a puitlin a (81% pass accuracy), tlarhnung venhimna lamah vawi nga lai a thawk hlawk bawk.

Chutih laiin, tlar hnung lamah goalkeeper Lammens-a'n hna a ngah hle a, Italy lamin goal thun tura an nawr nasat laiin vawi ruk ngawt goal tur a lo dang (saves) a, ball vawi 51 lai a khawih hman bawk a ni.

Belgium hian kar tharah UEFA Nations League match hnih dang an khel leh dawn a. Thawhṭanni zan hian France an hmachhawn ang a, hemi hnu Zirtawpni lo thleng turah Turkiye an luhchhuah leh thung dawn a ni.